اتىراۋ وبلىسىنىڭ بۇرىنعى اكىمى بەرگەي رىسقالييەۆتىڭ ۇلى اسلان رىسقالي ۇلىبريتانيا استاناسىندا ەليتالىق جىلجىمايتىن مۇلىككە يەلىك ەتىپ وتىرعانى انىقتالدى.

اشىق دەرەكتەرگە سۇيەنسەك، 2021 جىلدىڭ ءساۋىر ايىندا اسلان رىسقالي لوندوننىڭ كەننينگتون روۋد 346-348 مەكەنجايىنداعى عيماراتتىڭ ءبىرىنشى قاباتىنان پاتەر ساتىپ العان. ونىڭ قۇنى سول كەزدە 1،51 ميلليون فۋنت ستەرلينگتى (شامامەن 1 ميلليارد تەڭگە) قۇراعان. بۇگىندە بۇل مۇلىك 1،88 ميلليون فۋنتقا، ياعني 1،3 ميلليارد تەڭگەگە باعالانىپ وتىر.

رىسقالييەۆتەر وتباسى سوڭعى 12 جىلدان بەرى لوندوندا تۇرىپ جاتىر. ولار ۇلىبريتانيادان ساياسي باسپانا العان. ال قازاقستان تاراپى بەرگەي رىسقالييەۆتى 2019 جىلى سىرتتاي 17 جىلعا باس بوستاندىعىنان ايىرعان. ول ۇيىمداسقان قىلمىستىق توپ قۇردى، جەمقورلىق پەن بيۋدجەت قاراجاتىن اسا ءىرى كولەمدە جىمقىردى دەپ ايىپتالعان بولاتىن. ونىڭ اعاسى امانجان رىسقالييەۆ 16 جىلعا سوتتالعان.

ايتا كەتۋ كەرەك، رىسقالييەۆ 2006–2012 جىلدار ارالىعىندا اتىراۋ قالاسى مەن وبلىسىنىڭ اكىمى قىزمەتىن اتقاردى. قىزمەتىنەن كەتكەن سوڭ ونىڭ اتى ءبىرقاتار داۋلى ىستەرمەن، جەمقورلىقپەن جانە اكتيۆتەردى زاڭسىز يەلەنۋمەن بايلانىستى اتالا باستادى. تەرگەۋ ءىسى بىرنەشە جىلعا سوزىلدى.

ءبىر قىزىعى، 2020 جىلى تاركىلەنگەن مۇلىكتىڭ ءبىر بولىگى رىسقالييەۆتەر وتباسىنا قايتارىلعان. الايدا بۇل شەشىمگە باس پروكۋراتۋرا نارازىلىق ءبىلدىرىپ، كاسساسيالىق شاعىم ءتۇسىردى. جوعارعى سوت اقىرى پروكۋراتۋرانىڭ ۇستانىمىن قولدادى.