مەملەكەتتىك ءتىلدى مەنسىنبەگەن «براتسكيي شاشلىك»: قازاقشا ءمازىر سۇراعانى ءۇشىن «فاشيست» اتانعان ازامات داۋعا تۇرتكى بولدى، - دەپ حابارلايدى Qamshy.kz Stan سايتىنا سىلتەمە جاساپ.

الماتىدا ورنالاسقان «براتسكيي شاشلىك» كافەسى مەملەكەتتىك ءتىل — قازاق تىلىنە قۇرمەتسىزدىك تانىتىپ، قوعام نارازىلىعىنا ۇشىرادى. كافە قىزمەتكەرى قازاقشا ءمازىر سۇراعان تۇتىنۋشىعا 2گيس پلاتفورماسىندا «ناسيست»، «فاشيست» دەپ ءتىل تيگىزگەن. ارتىنشا پىكىردى ءوشىرىپ، ازاماتتى بۇعاتتاپ تاستاعان. جەلى قولدانۋشىلارى بۇل جاعدايعا جاپپاي رەاكسيا ءبىلدىرىپ، مەكەمەگە بويكوت جاريالاپ جاتىر.

مەملەكەتتىك ءتىلدى سۇراۋ — ناسيزم ەمەس، زاڭ تالابى

14 مامىر كۇنى دوسعالي ءامىروۆ ەسىمدى ازامات الماتى قالاسىنىڭ اقباقاي كوشەسىندەگى «براتسكيي شاشلىك» كافەسىندە تۇسكى اس ىشكەننەن كەيىن، 2گيس قوسىمشاسىندا پىكىر قالدىرىپ، ءمازىردىڭ تەك ورىس تىلىندە بولعانىن ەسكەرتكەن. الايدا، مەكەمە وكىلى بۇل سىنعا جاۋاپ رەتىندە بىلاپىت سوزدەر جازعان:

«سەن ءبارىن ءتۇسىنىپ تۇرسىڭ عوي، نەگە اقىماق كەيپىن تانىتىپ تۇرسىڭ؟ ناسيست، فاشيست. ەگەر پىكىردى وشىرمەسەڭدەر، قوناقتاردى كۇتىڭدەر!»

بۇدان بولەك، مەكەمە:

«سالەمەتسىز بە، ءبىز ءسىزدىڭ تىلىڭىزدە جاۋاپ بەرۋگە مىندەتتىمىز بە، الدە مەملەكەتىمىزدە ونداي زاڭ بار ما؟» – دەپ جازعان.

بۇل – ق ر «تىلدەر تۋرالى» زاڭىنىڭ 21-بابىنا اشىق تۇردە قايشى. زاڭ بويىنشا، تۇتىنۋشىلارعا ارنالعان بارلىق اقپارات (جارناما، ءمازىر، تاۋار باعاسى جانە ت.ب.) مىندەتتى تۇردە مەملەكەتتىك تىلدە ۇسىنىلۋى ءتيىس.

جالعان پاتريوتيزم: كەشىرىم سۇراپ، جاۋاپكەرشىلىكتى قىزمەتكەرگە ارتا سالدى

جاعداي ۋشىققان سوڭ، كافە الەۋمەتتىك جەلىدەگى پاراقشاسىندا كەشىرىم سۇراپ، بۇل وقيعاعا سول كۇنى كىمنىڭ جاۋاپ بەرگەنىن بىلمەگەنىن العا تارتتى. ءوز مالىمدەمەسىندە:

«قىزمەتكەر جۇمىستان بوساتىلدى. ءبىز قازاق حالقىنان كەشىرىم سۇرايمىز. بۇل ءبىزدىڭ قۇندىلىعىمىزعا ساي كەلمەيدى»، – دەپ جازدى.

الايدا بۇل اقتالۋ قوعامنىڭ اشۋىن باسا العان جوق. جەلى قولدانۋشىلارى كەشىرىم كەش ەمەس، مەملەكەتتىك ءتىلدى سىيلاماعان ۇستانىمعا قارسى ەكەنىن ايتتى.

TikTok-تاعى قوسارلانعان ستاندارت: پرەزيدەنت ءسوزىن الدىمەن سالىپ، كەيىن ءوشىردى

جانجالدان كەيىن ءدامحانا TikTok پاراقشاسىنا پرەزيدەنت قاسىم-جومارت توقايەۆتىڭ ءتىل ساياساتىنا قاتىستى سوزىنەن ءۇزىندى جاريالاپ، كوپ ۇزاماي ونى ءوشىرىپ تاستاعان. بۇل ارەكەت تە جەلى قولدانۋشىلارىنىڭ كۇدىگىن كۇشەيتتى. پرەزيدەنت بۇعان دەيىن ءتىل ماسەلەسىن ساياسيلاندىرۋعا جول بەرمەيمىز دەپ مالىمدەگەن ەدى. ءبىراق ونىڭ ءسوزىن مانيپۋلياسيا قۇرالىنا اينالدىرۋ – ەكىجۇزدىلىككە بالانىپ وتىر.

2گيس پەن دەربەس دەرەك قاۋىپسىزدىگىنە كۇمان

كوپ ۇزاماي، تاعى ءبىر قولدانۋشى 2گيس مودەراسياسىنىڭ قازاقشا پىكىرلەردى وتكىزبەۋى جانە پايدالانۋشى اقپاراتى سالىق ورگاندارىنا بەرىلەتىنى تۋرالى دابىل قاقتى. بۇل جاعداي قازاقستانداعى سيفرلىق پلاتفورمالاردىڭ بەيتاراپتىعى مەن قاۋىپسىزدىگىنە قاتىستى دا سۇراق تۋعىزدى.

«براتسكيي شاشلىك» وقيعاسى — تىلدىك قۇقىقتىڭ اياققا تاپتالۋىنىڭ ايقىن كورىنىسى. بۇل تەك ءبىر ازاماتتىڭ باسىنان وتكەن وقيعا ەمەس، تۇتاس قوعامنىڭ مەملەكەتتىك تىلگە دەگەن تالاپ-تىلەگىنىڭ زاڭدى ءارى ورىندى ەكەنىن كورسەتەدى.

مەملەكەتتىك ءتىل – تەك زاڭدىق نورما ەمەس، ۇلتتىق بولمىس پەن ەگەمەندىكتىڭ نەگىزى. قازاق ءتىلىن تالاپ ەتۋ – راديكاليزم ەمەس، كونستيتۋسيالىق قۇقىق. ال بۇل قۇقىقتى «ناسيزم»، «فاشيزم» دەپ اتاۋ — تەك كاسىبي ەتيكاسىزدىق ەمەس، قوعامدى ارانداتۋ.