بيىل 77 مىڭنان استام ءبىلىم گرانتى ءبولىندى – شەكتى بالدار وزگەرگەن جوق
بيىل جوعارى وقۋ ورىندارىنا 77 مىڭنان استام ءبىلىم گرانتى ءبولىنىپ وتىر. بۇل تۋرالى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا مالىمدەدى.
ونىڭ ايتۋىنشا، بارلىق ءبىلىم بەرۋ باعىتتارى ساقتالعان، ءارى شەكتى بالل تالاپتارىندا دا ەش وزگەرىس جوق.
– ۇلتتىق ءبىرىڭعاي تەستىلەۋ ناتيجەسى بويىنشا جوعارى وقۋ ورنىنا ءتۇسۋ ءۇشىن تالاپكەرلەر كەمىندە 50 بالل جيناۋى كەرەك. ال ۇلتتىق جوعارى وقۋ ورىندارى ءۇشىن بۇل كورسەتكىش – 75 بالل. سونىمەن قاتار، ءاربىر جوو ءوز ەرەجەسىنە ساي ودان دا جوعارى شەكتى بالل بەلگىلەي الادى، – دەدى گۇلزات كوبەنوۆا.
وسىعان بايلانىستى كوميتەت ءتورايىمى تالاپكەرلەرگە قۇجات تاپسىرار الدىندا تاڭداعان وقۋ ورنىنىڭ ناقتى شەكتى بالىن قاراپ شىعۋعا كەڭەس بەردى.
