بۇگىن Men media الاڭىندا سەمەيدەگى التىن ۇرلىعى ءىسى بويىنشا ۇستالعانداردىڭ جاقىندارى ەلوردالىق ۇقك تەرگەۋ يزولياتورىن تەكسەرۋدى تالاپ ەتىپ باسپا ءسوز جيىنىن وتكىزدى.
كۇدىكتىلەردىڭ تۋىستارى شاعىمدارىن ۇقك، ءىىم، انتيكور، باس پروكۋراتۋرا جاۋاپسىز قالدىرىپ وتىر دەيدى. سوزدەرىنشە، ازاپتاۋ فاكتىسى بويىنشا ەشقانداي تەكسەرىس جۇرمەگەن.
– ءبىز جاقىندارىمىزدى ازاپتاۋ تۋرالى بۇيرىق تىكەلەي ءماسىموۆ (ءقازىر قاماۋدا وتىرعان ۇقك ەكس-توراعاسى رەد.) پەن ونىڭ ادامدارىنان تۇسكەنىن بىلەمىز. بۇل تۋرالى ازاپتاۋ كەزىندە كۇشتىك قۇرىلىمدارداعى ادامداردىڭ ءوزى ايتتى. سونداي-اق بىزگە سەمەيدەگى "الەل" فيك اق فابريكاسىنان ۇرلانعان التىن قايرات ساتىبالدىعا تيەسىلى ءبىر كومپانياعا كەتىپ جاتقانىن ايتتى. بىزدە نەگە قىلمىستى اشۋ ءۇشىن ادامدى ازاپتاۋ كەرەك؟ نەگە بىلتىر ءبىر جىل بويى ازاپتاۋمەن اينالىسقان ۇقك وفيسەرلەرى قىزمەتىن جالعاستىرىپ ءجۇر، – دەيدى تەرگەۋ يزولياتورىندا وتىرعانداردىڭ ءبىرىنىڭ اپكەسى التىناي ابەيوۆا.
2021 جىلى سەمەيدە زاڭسىز التىن ساتۋمەن اينالىستى دەگەن كۇدىكپەن 37 ادام ۇستالعان. سولاردىڭ 28ء-ى ازاپتاۋعا ۇشىراعانىن مالىمدەگەن.
پىكىر قالدىرۋ