ەكى كۇننەن بەرى الماتى اسپانىن ادەمى اۋەزگە بولەگەن "ادەمى اۋەزدى ازانشى" V رەسپۋبليكالىق ازانشىلار جارىسى ءوز مارەسىنە جەتتى. قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ قاتىسۋىمەن وتكەن رۋحاني الامان دودادا وزا شاپقان جۇيرىكتەر ماراپاتتالدى. كىل جۇيرىكتە كىم جۇيرىك تارتىستى باسەكەدە ءادىل قازىلار القاسىنىڭ ۇيعارۋىمەن شەشۋشى كەزەڭگە وتكەن التى ازانشى اراسىنان  ۇزدىك ۇشتىكتى انىقتاۋ ءۇشىن ءوزارا سايىسقا ءتۇستى.

I ورىن سەيتقانوۆ قۋانىش باكەن ۇلى - تۇركىستان وبلىسى 700 000 تگ.

II ورىن ءاشىموۆ قاسىم ءابدۋماجىت ۇلى - الماتى قالاسى 500 000 تگ.

III ورىن يمانعالييەۆ سالامات ناسيحات ۇلى - اتىراۋ وبلىسى 300 000 تگ.

"ادەمى اۋەزدى ازانشى" V رەسپۋبليكالىق ازانشىلار جارىسىنا قاتىسىپ، كورسەتكەن بەلسەندىلىگى ءۇشىن - ءابدىمۇتالىپ جوراقۇل ۇلى - ماڭعىستاۋ وبلىسى جانە ءشاۋدىرباي ەربولات ەرگەش ۇلى - نۇرسۇلتان قالاسىنان كەلگەن ازانشىلارعا 100 000 تەڭگەدەن ىنتالاندىرۋ سىيلىعى تابىستالدى. قاتىسۋشىلار ىشىندە ەڭ جاسى ۇلكەن ازانشى ءوزىنىڭ ەرەكشە ۇنىمەن دارالانعان "فيرالي فەرعان ۇلى" مەشىتىنىڭ 50 جاستاعى  ازانشىسى ابدۋلعاففار سيروجيددينگە "كورەرمەن كوزايىمى" نوميناسياسىمەن 100 000 تەڭگە سىياقى بەرىلدى. ال قالعان قاتىسۋشى بارلىق ازانشىلار باس ءمۇفتيدىڭ ارنايى العىس حاتىمەن بىرگە 50 000 تەڭگە سىياقىمەن ماراپاتتالدى.

"ارداقتى پايعامبارىمىز (وعان اللانىڭ سالاۋاتى مەن سالەمى بولسىن) حاديسىندە: "كىمدە كىم جەتى جىل بويى ساۋابىن ءۇمىت ەتىپ ازان ايتسا، ول توزاق وتىنان قۇتىلادى"، دەپ سۇيىنشىلەگەن بولاتىن. قىزمەتىڭىزگە تابىس، وتباسىڭىزعا اماندىق، دەنىڭىزگە ساۋلىق جانە ومىرىڭىزگە بەرەكە تىلەيمىن"، - دەلىنگەن باس ءمۇفتي العىس حاتىندا.

قاسيەتتى جۇما كۇنىمەن قاتار كەلگەن جارىس سوڭىنان جەڭىمپاز ادەمى اۋەزبەن ازان ايتىپ، جاماعاتپەن جۇما نامازى وقىلدى. باس ءمۇفتي ناۋرىزباي قاجى تاعان ۇلى ەل اماندىعى مەن تىنىشتىعى ءۇشىن باتا جاساپ، دۇعا تىلەدى.

الماتى ورتالىق مەشىتىنىڭ باسپا ءسوز قىزمەتى