كاسىپكەر الماس ءابدىعاپپاروۆ "AV Construction" ج ش س كومپانياسىنان قارجى جىمقىردى دەگەن ايىپپەن 7 جىلعا سوتتالدى. بۇل تۋرالى الماتى قالاسى مەدەۋ اۋدانى №2 اۋداندىق سوتىنىڭ باسپا ءسوز قىزمەتى حابارلادى.
سوت 2021 جىلدىڭ ناۋرىز ايىندا الاس ءابدىعاپپاروۆ "AV-Construction" ءجشس-نىڭ كوممەرسيالىق ماسەلەلەر جونىندەگى ديرەكتورىنىڭ ورىنباسارى بولىپ قىزمەت ەتكەن كەزدە Esentai city تۇرعىن ءۇي كەشەنىندەگى تۇرعىن ءۇيدى ساتىپ الۋعا كەلگەن تۇتىنۋشىمەن الدىن الا كەلىسىم جاساسقانىن انىقتاعانىن حابارلادى. كەلىسىمشارت بويىنشا، تۇرعىن ءۇيدى ساتىپ الۋشى ءابدىعاپپاروۆقا 2 ملن دوللار بەرگەن. ءابدىعاپپاروۆ 1 ملن دوللاردى كومپانيا باسشىلىعىنا بەرىپ، قالعان 1 ملن دوللاردى زاڭسىز تۇردە وزىندە قالدىرعان.
سوت كۇدىكتى "AV-Construction" جشس-گە 418 ميلليون 640 مىڭ تەڭگە كولەمىندە ماتەريالدىق زالال كەلتىرگەنىن انىقتاعان.
الايدا الماس ءابدىعاپپاروۆ ءوز كىناسىن مويىندامادى. پروكۋرور سوتتان ءابدىعاپپاروۆتى 7 جىلعا باس بوستاندىعىنان ايىرۋدى، ال جابىرلەنۋشى كومپانيا وكىلى سوتتالۋشىنى كىنالى دەپ تانۋدى سۇرادى.
"سوت ۇكىمىمەن ءابدىعاپپاروۆ وزىنە سەنىپ تاپسىرىلعان مۇلىكتى اسا ءىرى مولشەردە ۇرلاعانى ءۇشىن كىنالى دەپ تانىلىپ، وعان قارجى ۇيىمدارىندا باسشىلىق لاۋازىمداردى اتقارۋ قۇقىعىنان 5 جىل مەرزىمگە ايىرا وتىرىپ، 7 جىل باس بوستاندىعىنان ايىرۋ جازاسى تاعايىندالدى. ازاماتتىق تۇلعا وكىلىنىڭ تالاپ ارىزى تولىق كولەمدە قاناعاتتاندىرىلدى. ۇكىم زاڭدى كۇشىنە ەنگەن جوق"، دەلىنگەن حابارلامادا.
بۇعان دەيىن، الماس ءابدىعاپپاروۆ بولات نازاربايەۆتىڭ تاپسىرماسىن قاماۋدا وتىرعانىن ايتىپ سۇحبات بەرگەن. الماس ءابدىعاپپاروۆ پەن ونىڭ تۋىستارى وتباسىلىق بيزنەسىن "بولات نازاربايەۆتىڭ ادامدارى" يەمدەنىپ العانىن مالىمدەگەن بولاتىن.
پىكىر قالدىرۋ