مەملەكەت باسشىسىنىڭ تاپسىرماسى بويىنشا قاڭتار وقيعالارىنىڭ ناتيجەسىندە زارداپ شەككەن شاعىن جانە ورتا بيزنەس سۋبەكتىلەرىنە تولەم تولەۋ جۇمىستارى اياقتالدى. بۇل تۋرالى الماتى اكىمى ەربولات دوسايەۆ ورتالىق كوممۋنيكاسيالار قىزمەتىندە وتكەن بريفينگتە مالىمدەدى.

ونىڭ ايتۋىنشا، جالپى 14،5 ملرد تەڭگەگە 1594 ءوتىنىم ماقۇلداندى.

«شاعىن جانە ورتا بيزنەس – قالا ەكونوميكاسىنىڭ نەگىزى. وندا ەڭبەككە قابىلەتتى حالىقتىڭ 64%-ى جۇمىس ىستەيدى. سوندىقتان بيزنەستى قولداۋعا ەرەكشە كوڭىل بولىنەدى. 2022 جىلى بيۋدجەتتەن قوسىمشا 5 ملرد تەڭگە ءبولىنىپ، 47 ملرد تەڭگەگە دەيىن ۇلعايتىلدى. بۇگىندە 16،5 ملرد تەڭگەگە شاعىن جانە ورتا بيزنەستىڭ 219 جوباسى قارجىلاندىرىلدى. ناتيجەسىندە، 1 ماۋسىمدا بەلسەندى جۇمىس ىستەيتىن شاعىن جانە ورتا بيزنەس سۋبەكتىلەرىنىڭ سانى ءبىر جىلدا 19،5%-عا 233 مىڭعا دەيىن ءوستى»، - دەدى دوسايەۆ.

سونداي-اق، ينۆەستيسيالىق بەلسەندىلىكتىڭ ءوسۋى بايقالادى. وسى جىلدىڭ 5 ايىندا جەكە ينۆەستيسيالار كولەمى 22،1%-عا ءوستى. ەڭ ۇلكەن ءوسىم قۇرىلىس يندۋسترياسىندا، ونەركاسىپتە، كولىك جانە قويمالاۋدا تىركەلدى، ولاردىڭ ۇلەس سالماعى 55%-دى قۇرايدى.

«بيىل ءى جارتى جىلدىقتا 132 ملرد تەڭگەگە 10 ينۆەستيسيالىق جوبا ىسكە اسىرىلدى، 183 جۇمىس ورنى قۇرىلدى. 2022 جىلعا ەڭبەك ونىمدىلىگى جوعارى 2،8 مىڭ تۇراقتى جۇمىس ورنىن قۇرا وتىرىپ، 588 ملرد تەڭگە سوماسىنا 77 جەكە جوبانى ىسكە اسىرۋ جوسپارلانعان»،  - دەدى دوسايەۆ.