بۇگىن پرەزيدەنتتىڭ باسپا ءسوز قىزمەتى ق.توقايەۆ كىشى قاجىلىق جاساپ، قاعباعا كىرگەنى تۋرالى اقپارات جاريالادى. مەككە قالاسىنداعى قاعبانىڭ ەسىگى جىلىنا 2 رەت تەك لاۋازىمدى تۇلعالار مەن ساۋد ارابيا باسشىلىعى رۇقسات ەتكەن ەرەكشە قوناقتار ءۇشىن اشىلادى. ول جەرگە كىرگەن ادام دۇعا جاساپ، تىلەك تىلەيدى. بۇگىنگە دەيىن قاعباعا تۇركيا، ازەربايجان، تۇركمەنستان، سينگاپۋر پرەزيدەنتتەرى كىرگەن. ەكس-پرەزيدەنت نۇرسۇلتان نازاربايەۆ تا قاعباعا كىرۋ قۇرمەتىنە لايىق دەپ تانىلعان، ءتىپتى بىرنەشە رەت. ول بەرگەن سۇحباتتارىندا قاعبادا "ەلى ءۇشىن دۇعا جاساعانىن" ايتقان.

نازاربايەۆ نەشە رەت قاجىلىق جاسادى؟

نۇرسۇلتان نازاربايەۆ العاش رەت 1994 جىلى ساۋد ارابياسىنىڭ استاناسى ەر-ريادقا ساپارى بارىسىندا كىشى قاجىلىقتى وتەپ، قاعباعا كىرگەن. نازاربايەۆتىڭ قاعباعا بارعان ءساتى تۋرالى 2012 جىلى تۇسىرىلگەن "بولشايا پوليتيكا بەز گالستۋكا" دەرەكتى فيلمىندە ايتىلدى.

نازاربايەۆتىڭ العاشقى قاجىلىعى كەزىندە قاعبادا جوندەۋ جۇمىستارى بولىپ جاتقان. الايدا نازاربايەۆ ساۋد ارابيا كورولىنىڭ رۇقساتىمەن مۇسىلماندار ءۇشىن قاسيەتتى ورىنعا باس سۇعۋ مۇمكىندىگىنە يە بولعان.

كەيىن سۇحباتتارىنىڭ بىرىندە نازاربايەۆ قاعباعا كىرگەن كەزدە "حالقىم ءۇشىن دۇعا جاسادىم" دەگەن. 

"مەككەدە اللانىڭ ءۇيى قاعبانىڭ ىشىنە كىرىپ تۇرعاندا ەڭ ءبىرىنشى تىلەگىم – حالقىما جاقسىلىق. وسى قيىن-قىستاۋدان ەلىمدى امان-ەسەن الىپ شىعىپ، جاقسى ومىرگە جەتۋگە ءبىزدى قولداي كور دەگەنمىن" دەگەن ەكس-پرەزيدەنت ۆيدەودا. 

كەيىن 2013 جىلى Youtube جەلىسىندە نۇرسۇلتان ءابىش ۇلىنىڭ تولىق قاجىلىق وتەپ جۇرگەن ۆيدەوسى تارادى. ۆيدەونى جاريالاعان SunnaPress.com سايتىنىڭ جازۋىنشا، قازاقستان پرەزيدەنتiنiڭ قاجىلىقتا جۇرگەنiن بiرنەشە ادام كورگەن جانە "پرەزيدەنتتiڭ ءتوڭiرەگiندەگi ادامدار" مۇنى راستاعان. الايدا بۇل تۋرالى رەسمي دەرەك جوق. تەك تۇركيالىق ب ا ق وكىلدەرى نازاربايەۆ سول جىلى مەككەدە بولعانى تۋرالى اقپارات جاريالاعان. 

توقايەۆتىڭ قاعباعا كىرگەنى كوپشىلىكتىڭ ەسىنە نازاربايەۆتىڭ دا قاسيەتتى ورىنعا بارعانىن ءتۇسىردى. سولاردىڭ كەيبىرى "نازاربايەۆ تىلەگەن دۇعاسىنا ءوزى ساي باسشى بولا المادى، توقايەۆتىڭ دا باعاسىن قاجىلىققا بارۋىنا قاراپ ەمەس، پرەزيدەنت رەتىندەگى ىستەگەن ىسىنە وراي بەرۋ كەرەك" دەپ جاتىر.