اسكەردە قازا تاپقان ماڭعىستاۋلىق الىبەك قالبايعا قاتىستى تەرگەۋ اياقتالدى، دەپ حابارلادى استانا ارناسى.
باسىلىم مالىمەتىنشە، مارقۇممەن اسكەردە بورىشىن بىرگە وتەگەن سارباز كۇدىكتى رەتىندە قاماۋعا الىنعان. سوتقا دەيىنگى تەرگەۋ كەزىندە كۇدىكتىنىڭ كىناسىن دالەلدەيتىن ماتەريال تولىعىمەن جينالدى دەيدى قۇزىرلى ورگاندار.
"قاتارداعى جاۋىنگەر قالبايدىڭ قايتىس بولۋى بويىنشا قىلمىستىق ءىستىڭ تەرگەۋى اياقتالدى. قازىرگى جاعدايدا تاراپتار ءىستىڭ قۇجاتتارىمەن تانىسۋدا. سودان كەيىن ءىستى سوتقا جىبەرەتىن بولامىز. كۇدىككە اسكەردە بىرگە جۇرگەن امانجولوۆ دەگەن جاۋىنگەر ىلىنگەن. ءقازىر ول سوت سانكسياسىمەن قاماۋدا وتىر. ول ءىستىڭ ماتەريالدارىمەن تانىسۋدا" دەدى باس اسكەري پروكۋراتۋرانىڭ اعا كومەكشىسى ەركىن قوجا-احمەت.
بۇعان دەيىن، جامبىل وبلىسىنداعى اسكەري بولىمدە قازا تاپقان ماڭعىستاۋلىق ساربازدىڭ تۋىستارى "قىلمىس تولىق اشىلمادى" دەپ نارازىلىق بىلدىرگەن بولاتىن. ارتىنشا اسكەري پروكۋراتۋرا اسكەردەگى جاعدايدى ءجىتى نازارعا العانىن جەتكىزگەن.
ماڭعىستاۋلىق سارباز 23 ساۋىردە جامبىل وبلىسىنداعى گۆاردەيسك اسكەري قالاشىعىندا كوز جۇمعان. پرەزيدەنت وسى وقيعاعا قاتىستى باس پروكۋراتۋرا مەن قورعانىس مينيسترلىگىنە جانە قۇزىرلى ورگاندارعا جان-جاقتى تەكسەرۋ جۇرگىزۋدى جانە شىنايى سەبەبىن انىقتاۋدى تاپسىرعان.
پىكىر قالدىرۋ