قازاقستاننىڭ باس پروكۋراتۋراسى قاڭتار وقيعاسىنان كەيىن ۇستالىپ، ازاپتاۋعا ۇشىراعان قىرعىز مۋزىكانتى ۆيكرام رۋزاحۋنوۆتىڭ ءىسى بويىنشا ونى ەلگە اكەلۋ تۋرالى كەلىسسوز ءجۇرىپ جاتىر.

Tengrinews.kz سايتىنىڭ جازۋىنشا، 2022 جىلعى 10 اقپانىنان باستاپ سىبايلاس جەمقورلىققا قارسى قىزمەتتىڭ الماتى وبلىسى بويىنشا دەپارتامەنتى قىرعىز دجازمەنى ۆيكرام رۋزاحۋنوۆقا قاتىستى ازاپتاۋدى قولدانۋ دەرەگى بويىنشا قىلمىستىق كودەكستىڭ 146-بابى 2-بولىگى 1-تارماعى ("ادامدار توبى نەمەسە الدىن الا ءسوز بايلاسۋ ارقىلى ادامدار توبى جاساعان ازاپتاۋلار") بويىنشا سوتالدى تەرگەۋ امالدارىن جۇرگىزىپ جاتىر.

19 اقپاندا رۋزاحۋنوۆتى تەرگەۋ ورگانى جابىرلەنۋشى دەپ تانىعان.

"ءقازىر ءىس بويىنشا الماتى قالاسى، الماتى وبلىسى پوليسيا دەپارتامەنتى، ۇقك شق قىزمەتكەرلەرى مەن مەديسينا قىزمەتكەرلەرىنەن جاۋاپ الىندى، الايدا ءبىرقاتار سەبەپكە بايلانىستى كۇدىكتىلەردى انىقتاۋ ازىرگە مۇمكىن ەمەس (بەينەجازبالار، كەلۋشىلەر مەن جەتكىزىلگەن ادامداردى تىركەۋ جۋرنالدارى جوق، بارلىق قىزمەتكەر بەتپەردە كيگەن، ونىڭ ىشىندە مەديسينالىق بەتپەردە كيگەندەر دە بولعان)" دەدى باس پروكۋراتۋرا وكىلدەرى.

سونداي-اق، وبلىستىق پوليسيا دەپارتامەنتىنەن رۋزاحۋنوۆتىڭ وقيعاسىنا قاتىسى بار بارلىق قىزمەتكەردىڭ سۋرەتى تالاپ ەتىلگەنى بەلگىلى بولدى.

"رۋزاحۋنوۆ قاجەتتى تەرگەۋ ارەكەتتەرىن جۇرگىزۋ ءۇشىن بىرنەشە رەت تەرگەۋ ورگانىنا شاقىرىلدى. قازىرگى ۋاقىتتا قاۋىپسىزدىك شارالارىن قامتاماسىز ەتە وتىرىپ، ەلگە كەلۋى تۋرالى كەلىسسوز جۇرگىزىلىپ جاتىر" دەدى قازاقستان باس پروكۋراتۋراسىنىڭ وكىلدەرى.

بۇعان دەيىن ۆيكرام رۋزاحۋنوۆ قىرعىزستاندا اقپان ايىندا قوزعالعان وزىنە قاتىستى تەرگەۋ جۇمىستارى اياقتالعانىن، بىشكەك قۇقىق قورعاۋ ورگاندارى تەرگەۋ ناتيجەلەرىن قازاقستانعا جىبەرەتىنىن ءمالىم ەتكەن.

"ساراپشىلار دەنساۋلىعىما اۋىر زيان كەلگەنىن انىقتادى. جينالعان ماتەريالدار قىرعىزستاننىڭ باس پروكۋراتۋراسى ارقىلى كىنالى تۇلعالاردى انىقتاۋ جانە قىلمىستىق جاۋاپكەرشىلىككە تارتۋ ءۇشىن قازاقستاننىڭ قۇزىرلى ورگاندارىنا جىبەرىلەتىن بولادى"، دەگەن رۋزاحۋنوۆ.

9 قاڭتاردا "قازاقستان" جانە "حابار 24" ارنالارى "قازاقستانداعى ميتينگكە قاتىسقانى ءۇشىن قىرعىزستان ازاماتى اقشا العان" دەگەن سيۋجەت كورسەتكەن. ۆيدەودا بەتى-اۋزى كوگەرگەن ازامات 1 قاڭتاردا بەيتانىس ادامدار تەلەفون ارقىلى حابارلاسىپ، ميتينگىگە قاتىسۋ ءۇشىن 90 مىڭ تەڭگە ۇسىنعانىن، بيلەت اپەرگەنىن، قازاقستاندا پاتەرگە ورنالاستىرعانىن ايتادى. 

كوپ ۇزاماي قىرعىزستاندىق باسىلىمدار ۆيدەوداعى ادام قىرعىزستاندا بەلگىلى دجاز مۋزىكانتى ۆيكرام رۋزاحۋنوۆ ەكەنىن، قازاقستانعا كونسەرتكە كەلگەنىن جارىسا جازدى. 

ۇزاماي رۋزاحۋنوۆ بوساتىلىپ، 10 اقپان كۇنى الەۋمەتتىك جەلىدەگى پاراقشاسىندا قازاقستاننىڭ تەرگەۋ يزولياتورىندا ازاپتالعانىن مويىنداپ، مالىمدەمە جاسادى.