شقو-دا تارباعاتاي اۋدانىنىڭ ورتالىعى اقجار اۋىلىنىڭ 100 جىلدىعى، داڭقتى قولباسشى حان باتىر قاراكەرەي قابانبايدىڭ 330 جىلدىق مەرەيتويىنا وراي ءدۇبىرلى دودا، ايتۋلى شارا ءوتتى.

اقجارداعى قابانباي ساياباعىندا 25 اقشاڭقاي كيىز ءۇي تىگىلىپ، جەرگىلىكتى تۇرعىندار مەن اۋدان قوناقتارى قازاقتىڭ حاس باتىرى قابانبايدىڭ داڭقتى جولىنان سىر شەرتەتىن تەاترلاندىرعان كورىنىستى تاماشالاپ، رۋحاني ءلاززات الدى.

ايتۋلى شاراعا شقو اكىمىنىڭ ورىنباسارى نۇرجان سايلاۋبەك ۇلى ارنايى كەلىپ، جينالعان جۇرتشىلىققا اقجارما تىلەگىن جەتكىزدى.

"ءباھادۇر بابامىز قارەكەرەي قابانبايدىڭ 330 جىلدىق مەرەيتويىمەن اقجار اۋدانىنىڭ قۇرىلۋى قاتار كەلىپ، ىرىستى جەر، بەرەكەنىڭ مەكەنىنە اينالدى. وبلىس اكىمى دانيال كەنجەتاي ۇلى اقجار اۋدانىنىڭ كەشەندى دامىتۋ جوسپارىنا بيىلعى 1 ميلليارد تەڭگە بولىنسە، الداعى بەس جىلدا اتالعان قارجى 5 ەسەگە كوبەيمەك. سونداي-اق 48 جوبا ىسكە اسىرىلىپ، وعان 7،8 ميلليارد تەڭگە قاراستىرىلدى" دەپ اتاپ ءوتتى شقو اكىمىنىڭ ورىنباسارى نۇرجان سايلاۋبەك ۇلى.

ايتۋلى ءىس شارا اياسىندا رەسپۋبليكالىق دەڭگەيدە قازاق كۇرەسى ۇيىمداستىرىلىپ، ەلىمىزدىڭ ءار تۇكپىرىنەن كەلگەن، سايدىڭ تاسىنداي ىرىكتەلگەن 36 بالۋان بوز كىلەمدە باقتارىن سىناۋدا. جەڭىسكە جەتكەن وگىز بالۋان مەن تۇيە بالۋانعا اۆتوكولىكتى دەمەۋشىلەر سىيعا بەرمەك.

مادەني جانە سپورتتىق ءىس شارانىڭ ۇيىمداستىرۋ كوميتەتىنىڭ ءتوراعاسى ءدۇبىرلى توي جايلى ءوز پىكىرىن ءبىلدىردى.

"اقجار اۋىلىندا ۇلكەن توي. دارابوز قابانباي باتىر ۇلىقتالىپ، سپورتتىق ءارى مادەني شارالار وتۋدە. رەسپۋبليكالىق الامان بايگە مەن كوكپار وتپەك. جەڭىمپازدارعا دەمەۋشىلەر تاراپىنان اۆتوكولىك تارتۋ ەتىلەدى. سونىمەن قاتار باتىر بابا رۋحىنا اس بەرىلىپ، قابانباي قوجاعۇل ۇلىنىڭ 330 جىلدىق مەرەيتويىنا ارنالعان "بابالار ەرلىگى ۇلتقا مۇرا، ۇرپاققا ۇلگى" اتتى عالىمدار، تاريحشىلار، زيالى قاۋىم وكىلدەرىنىڭ قاتىسۋىمەن عىلىمي-تەوريالىق كونفەرەنسيا ءوتتى" دەدى تالعات مازىبايەۆ.

تارباعاتاي اۋدانىنىڭ ورتالىعى اقجار اۋىلىنداعى ايتۋلى قوس مەرەيتوي شاراسى "ارمانى بولعان ازاتتىق" جازبا اقىندار ءمۇشايراسى، گالا كونسەرت پەن مەرەكەلىك وت شاشۋ مەن قورىتىندىلانباق.