الماتى قالاسى مەن سولتۇستىك قازاقستان وبلىسىندا 200 مىڭنان استام وقۋشى 2022 جىلعى 1 قىركۇيەكتەن باستاپ بەس كۇندىك وقۋ اپتاسىنا كوشەدى. سونداي-اق وسى وڭىرلەردەگى 25 مىڭنان استام ءمۇعالىم ءۇشىن سەنبى دەمالىس كۇنگە اينالادى. 5 كۇندىك وقۋعا مەكتەپتەردىڭ 100%-ى كوشەدى. بۇل تۋرالى وقۋ-اعارتۋ مينيسترلىگىندە وتكەن جيىندا الماتى جانە سقو ءبىلىم باسقارمالارىنىڭ باسشىلارى باياندادى.

مينيسترلىك مالىمەتىنشە، الماتىدا بۇرىن سەنبى كۇندەرى وقىعان 166 مىڭ بالا مەن جۇمىس ىستەگەن 13 مىڭ ءمۇعالىم، 124 مەكتەپ ەندى بەس كۇندىك وقۋ اپتاسىنا كوشەدى.

سقو-دا دا بەس كۇندىك وقۋعا 74 مىڭعا جۋىق بالا وقيتىن 470-تەن استام مەكتەپ 100 پايىز كوشەدى. ءبىر اۋىسىمدا 23 مىڭ وقۋشىسى بار 254 مەكتەپ وقيدى.

وسىلايشا، مۇعالىمدەرگە دە، وقۋشىلارعا دا جۇكتەمە ازايادى.

مينيسترلىك بۇل وقۋ جىلىن 31 مامىردا اياقتاۋ جانە وقۋ جۇكتەمەسىن ازايتۋ تۋرالى شەشىمنىڭ اياسىندا مۇمكىن بولعانىن اتاپ ءوتتى.

– پرەزيدەنت پەداگوگ مارتەبەسىن كوتەرۋگە ەرەكشە كوڭىل ءبولىپ وتىر. قاسىم-جومارت كەمەل ۇلى توقايەۆتىڭ جەكە قولداۋىنىڭ ارقاسىندا "پەداگوگ مارتەبەسى تۋرالى" زاڭ قابىلدانىپ، مۇعالىمدەردىڭ جالاقىسى كوتەرىلىپ، جۇكتەمەسى قىسقارتىلدى. زاڭعا تاۋەلدى اكتىلەر قابىلدانىپ، اكىمدىكتەر بۇرىنعىداي مۇعالىمدەردى مىندەتىنەن تىس ارتىق جۇمىستارعا تارتپايدى. پرەزيدەنت تاپسىرمالارى بويىنشا اتقارىلاتىن جۇمىستار اياسىندا الداعى ۋاقىتتا سەنبى مەكتەپ مۇعالىمدەرى ءۇشىن رەسمي دەمالىس كۇنىنە اينالادى، بۇل ارىپتەستەرىمىزگە ساباققا دايىندالىپ، ۋاقىتتى وتباسىمەن بىرگە وتكىزۋگە مۇمكىندىك بەرەدى. مۇنىڭ بالالارعا بەرەر ارتىقشىلىقتارى بار، ەندى ولاردىڭ دا كوبىرەك بوس ۋاقىتى بولادى. ءبىز بۇل ماسەلەنى ەرەكشە باقىلاۋعا الدىق، – دەدى مينيستر كەزدەسۋدە.