"توقايەۆ نازاربايەۆتىڭ ستيلىندە كەزەكتەن تىس پرەزيدەنت سايلاۋىن جاريالادى. ۋاقىت تىعىز. ارينە، ىڭعايسىز ادامداردى ورتالىق سايلاۋ كوميسسياسى تىركەمەس. ءبىر بالە تابادى عوي. ءبىراق، مەن 2019 جىلى بار رەسمي پروسەدۋرادان وتكەنمىن. ءيا، ءابليازوۆ، قاجىگەلدين، يۋتۋبتاعى باسقا ەسكى وپپوزيسيا مەنى قارالادى، ءبىراق ەرتەڭ باسقا بيلىك قارسىلاسىن تىركەسە، قولدايمىن. تىركەمەسە، پرەزيدەنتتىككە ۇسىنىلىپ، تىركەلۋگە مەن دايىن، ويتكەنى تىركەلۋ ءۇشىن زاڭ جاعىنان ءمىنسىزبىن" دەپ جازدى ول facebook  پاراقشاسىندا.

 

2019 جىلعى سايلاۋدا 70،96 % پايىزبەن قاسىم-جومارت توقايەۆ جەڭىسكە جەتكەن. وپپوزيسيالىق ساياساتكەر ءامىرجان قوسانوۆ سايلاۋشىلار داۋسىنىڭ 16،23 % پايىزىن جيناپ، ەكىنشى ساتىعا جايعاستى. الايدا قوسانوۆ رەسمي دەرەكتەن الدەقايدا كوپ داۋىس جينادى دەپ سانايتىندار كوپ. سايلاۋدىڭ رەسمي قورىتىندىسى شىقپاي تۇرىپ، ەكزيت-پولل ناتيجەسى جاريالانعاندا قوسانوۆ الدىن الا قورىتىندىمەن كەلىسكەندەي، توقايەۆتى جەڭىسىمەن قۇتتىقتايدى. بۇل – ونىڭ جاقتاستارى مەن وعان داۋىس بەرگەندەر اراسىندا نارازىلىق تۋدىرىپ، "قوسانوۆ سايلاۋ ناتيجەسىمەن كەلىسپەي، سايلاۋشىلار داۋسى ءۇشىن كۇرەسۋى كەرەك ەدى، قورىتىندى شىقپاي جاتىپ بەرىلگەنى بيلىكتىڭ جوباسى بولعانى" دەگەن سارىندا پىكىرلەر ايتىلدى. سودان بەرى قوعامدا قوسانوۆ، "بيلىكتىڭ جوباسى" سوزدەرى قاتار اتالاتىن بولدى. قوسانوۆتىڭ ءوزى سايلاۋشىلار داۋسى ءۇشىن كۇرەسپەۋىن "حالىقتى كوشەگە باستاپ شىقسام، قان توگىلەر ەدى، مەن جاڭاوزەن قىرعىنىن كورگەن اداممىن، ەشكىمنىڭ قانىن موينىما جۇكتەي المايمىن" دەپ بيلىك حالىق نارازىلىعىن جانشۋ ءۇشىن بارىنە باراتىنىن ايتقان.