ۇلتتىق ستاتيستيكا بيۋروسى 2022 جىلعى 1 تامىزداعى جاعداي ويىنشا قازاقستان حالقىنىڭ سانى 19 644 067 ادامعا جەتكەنىن حابارلادى.
بيۋرو مالىمەتىنشە، 2021 جىلعى ساناققا 19 186 015 ادام قاتىسقان. وسىلايشا، 2009 جىلعى حالىق ساناعىنان بەرى ەل حالقى 20%-عا نەمەسە 3،2 ملن ادامعا وسكەن. بۇعان حالىقتىڭ تابيعي ءوسىمى مەن قازاقستان اۋماعىنا كوشى-قون اعىنى ىقپال ەتتى.
ساناق قورىتىندىسى بويىنشا قالا تۇرعىندارىنىڭ ۇلەسى 61،2%-عا دەيىن ءوستى، الدىڭعى ساناق مالىمەتتەرىمەن سالىستىرعاندا ءوسىم 5%-دى قۇرادى. تيىسىنشە، اۋىل حالقىنىڭ ۇلەسى 43،9%-دان 38،8%-عا دەيىن ازايدى. قالا تۇرعىندارىنىڭ باسىم بولىگى قاراعاندى وبلىسىندا تۇرادى – تۇرعىنداردىڭ 80%-ى، ياعني 1 ملن-نان استام ادام. كەرىسىنشە، قالالىقتار سانى ەڭ از ايماق – تۇركىستان وبلىسى. مۇندا بارلىعى 498 مىڭ ادام نەمەسە وبلىس تۇرعىندارىنىڭ 24،3%-ى قالالىق جەردە تۇرادى.
الدىڭعى ساناق قورىتىندىسى بويىنشا نۇر-سۇلتاندا 619 مىڭ ادام تۇرىپ جاتقان، 2021 جىلعى ساناق كەزىندە ەلىمىزدىڭ باس قالاسىنداعى حالىق سانى 1،23 ملن ادامدى قۇرادى.
قازاقستانداعى ايەلدەر سانى بۇرىنعىداي ەرلەر سانىنان باسىم. ساناق قورىتىندىسى بويىنشا ولاردىڭ سانى جارتى ميلليونعا (536،3 مىڭ ادامعا) ارتىق بولدى. ەگەر پايىزبەن ايتار بولساق، ەرلەر ۇلەسى – 48،6% (9 324 840 ادام)، ايەلدەر ۇلەسى – 51،4% (9 861 175 ادام) قۇرادى. وسىلايشا، قازاقستانداعى 100 ايەلگە 99 ەر ادامنان كەلەدى.
پىكىر قالدىرۋ