كەڭەس-گەرمان سوعىسىندا قازا تاپقان بەس قازاقستاندىق جاۋىنگەردىڭ سۇيەگى جەرلەنگەن جەر تابىلدى. ونى رەسەي ىزدەۋشىلەرى كالينينگراد وبلىسىنان تاپقان. ەندى ولار قازا تاپقانداردىڭ تۋىستارىن تابۋعا كومەك سۇراپ وتىر، دەپ حابارلادى Tengrinews.kz سايتى.

باسىلىم مالىمەتىنشە، "مايدان جولى" ىزدەستىرۋ-زەرتتەۋ وتريادىنىڭ كومانديرى الەكساندر شيتوۆ "سوۆەست" وتريادىنىڭ ىزدەۋشىلەرى باگراتيونوۆسكيي اۋدانىنداعى كورنيەۆو (بۇرىنعى سينتەن) اۋىلى ماڭىنان بەيىتتەردى تاپقانىن ايتقان.

قازا تاپقاندار 1945 جىلدىڭ اقپان-ناۋرىزىندا فاشيستىك توپتى تالقانداۋعا قاتىسقانى، ولاردىڭ اراسىندا قازاقستاندىقتار دا بار ەكەنى حابارلاندى.

ولار:

يۆان ستەپانوۆيچ رۋدينسكيي. 1902 جىلى اقتوبە وبلىسى دالا اۋدانىنا قاراستى حەرسون اۋىلىندا دۇنيەگە كەلگەن.

اتقىش يۆان رۋدينسكييدىڭ سوڭعى قىزمەت ورنى – 55-گۆارديالىق اتقىشتار ديۆيزياسىنىڭ 166-گۆارديالىق قىزىل تۋلى اتقىشتار پولكى. 1945 جىلى ناۋرىزدا قازا بولعان.

يۆان ميحايلوۆيچ سولوۆيەۆ. 1902 جىلى اقتوبەدە تۋعان قىزىل اسكەر سولداتى. 1943 جىلى 26 جەلتوقساندا قاراعاندى ​​قالاسى لەنين اۋدانى لەنين رۆك ارقىلى مايدانعا جۇمىلدىرىلعان. 1945 جىلى 27 اقپاندا قايتىس بولعان.

الەكسەي اندرەيەۆيچ شەلۋحين. 1912 جىلى كۋرسك وبلىسى، سينەيەۆ اۋدانى، لۋگ كەڭشارىندا دۇنيەگە كەلگەن. شىعىس قازاقستان وبلىسى زىريان اۋدانى زىريان رۆك ارقىلى 1941 جىلى شىلدەدە مايدانعا جۇمىلدىرىلعان. مۇراعات دەرەكتەرىنە سايكەس، اتقىشتار روتاسىنىڭ ستارشيناسى 55-گۆارديالىق يركۋتسك-پينسك ديۆيزياسىنىڭ 166-گۆارديالىق قىزىل تۋلى اتقىشتار پولكىنىڭ قۇرامىندا شايقاسقان.

حاميت تۇرلبەن ۇلى (تۇرلبەك ۇلى، تۇرحەبەت ۇلى) ەگسۋبايەۆ. 1906 جىلى اقمولا وبلىسى اتباسار اۋدانى №7 اۋىلدا تۋعان. تانك كومانديرى، لەيتەنانت، 213-جەكە تانك ورشا قىزىل تۋ وردەندى بريگاداسىنىڭ قۇرامىندا سوعىسقان. 1945 جىلى ناۋرىزدا قازا تاپقان.

يۆان الەكسەيەۆيچ كولپاكوۆ. 1922 جىلى سولتۇستىك قازاقستان وبلىسى ايىرتاۋ اۋدانى چالقار اۋىلىندا دۇنيەگە كەلگەن. جاياۋ اسكەر ۆزۆودىنا قولباسشىلىق ەتكەن. سوڭعى قىزمەت ورنى 55-گۆارديالىق يركۋتسك-پينسك ديۆيزياسىنىڭ 166-گۆارديالىق قىزىل تۋلى اتقىشتار پولكى بولعان. 1945 جىلى ناۋرىزدا قازا تاپقان.

"بەيجاي قارامايتىنداردىڭ بارىنەن قازا بولعان جەرلەستەرىمىزدىڭ تۋىستارىن ىزدەۋگە كومەكتەسۋىن سۇرايمىز" دەپ شاقىردى الەكساندر شيتوۆ.