ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندىق ەڭبەك بيرجاسىنداعى  تامىز ايى بويىنشا قالىپتاسقان احۋالدى جاريالادى.

مينيسترلىك مالىمەتىنشە، ەلەكتروندىق ەڭبەك بيرجاسىندا تامىزدا 119،9 مىڭ بوس جۇمىس ورنى جانە 93،9 مىڭ تۇيىندەمە جاريالانعان.

تامىز ايىندا بوس جۇمىس ورىندارىنىڭ باسىم كوپشىلىگى ءبىلىم بەرۋ سالاسىندا بايقالعان. وعان جاڭا وقۋ جىلى اسەر ەتكەن. بوس جۇمىس ورىندارى كوپ سالالار قاتارىنا قۇرىلىس جانە اۋىل شارۋاشىلىعى كاسىپورىندارى كىرگەن..

ۇسىنىلاتىن ءارى كۇتىلەتىن جالاقى مولشەرى وڭىرلەر مەن ماماندىقتار بويىنشا ءارتۇرلى. اتىراۋ وبلىسىندا ەڭ جوعارى ەڭبەكاقى ۇسىنىلعان. وندا 824 مىڭ تەڭگە جالاقى الاتىن 20 ونەركاسىپتىك الپينيستكە ۆاكانسيا جاريالانعان.

نۇر-سۇلتان جانە الماتى قالالارىندا، الماتى جانە شىعىس قازاقستان وبلىستارىندا جۇمىس بەرۋشىلەر مەملەكەتتىك ورگاندارداعى قۇرىلىمدىق بولىمشەلەردىڭ باسشىلارىنا 500 مىڭنان 730 مىڭ تەڭگەگە دەيىن جالاقى ۇسىنعان.

عىلىمي قىزمەتكەرلەر ورتاشا ەسەپپەن وزدەرىن  2،7 ملن تەڭگە، باس ديرەكتورلار 2،3 ملن تەڭگە، اۆياسيا ينجەنەرلەرى 1،6 ملن تەڭگە، كەنىش ديرەكتورلارى 1،5 ملن تەڭگە جانە قوسىمشالاردى ازىرلەۋشىلەر 1،2 ملن تەڭگە جالاقىعا لايىقتى دەپ سانايدى.

ال جۇمىس بەرۋشىلەر مەملەكەتتىك ۇيىمداردىڭ باسشىلارىنا 640 مىڭ تەڭگە، باس تەحنولوگتار مەن قارجىلىق ريسكتەر مەنەدجەرلەرىنە 500 مىڭ تەڭگە جالاقى ۇسىنۋعا ءازىر.