AMANAT پارتياسىنىڭ ءتوراعاسى – ق ر پارلامەنتى ءماجىلىسىنىڭ سپيكەرى ەرلان قوشانوۆ الداعى پرەزيدەنت سايلاۋىنا قازىرگى پرەزيدەنت قاسىم-جومارت توقايەۆتىڭ ۇمىتكەرلىگىن قولداۋ جونىندەگى حالىقتىق كواليسيا قۇرىلاتىنىن حابارلادى. بۇل تۋرالى ول پارتيا سەزىندە ايتتى.

"وزدەرىڭىزگە بەلگىلى، بىزدەن باسقا دا ءبىرقاتار پارتيالار مەن ساياسي بىرلەستىكتەر پرەزيدەنتتىككە مەملەكەت باسشىسى قاسىم-جومارت كەمەل ۇلى توقايەۆتىڭ كانديداتۋراسىن ۇسىنىپ وتىر. وسى ورايدا ءبىز سول ساياسي ۇيىمدارمەن بىرلەسىپ، قاسىم-جومارت كەمەل ۇلى توقايەۆتى قولداۋ جونىندەگى حالىقتىق كواليسيا قۇرۋ جونىندە كەلىسىمگە كەلدىك" دەدى ول.

ءماجىلىس سپيكەرىنىڭ ايتۋىنشا، بۇگىن تۇستەن كەيىن پرەزيدەنتتىڭ قاتىسۋىمەن فورۋم وتپەك.

AMANAT پارتياسى سەزدە قاسىم-جومارت توقايەۆتى پرەزيدەنتتىككە كانديدات رەتىندە ۇسىنعان. بۇدان بولەك "قازاقستان حالىق پارتياسى"، ءماسليحاتتار دەپۋتاتتارىنىڭ رەسپۋبليكالىق قوعامدىق بىرلەستىگى، "قازاقستان سپورتشىلار وداعى" رەسپۋبليكالىق قوعامدىق بىرلەستىگى، قازاقستاننىڭ ازاماتتىق اليانسى، "ارداگەرلەر ۇيىمى" رەسپۋبليكالىق قوعامدىق بىرلەستىگى، "Qazaqstan Team" قوعامدىق بىرلەستىگى، ۇلتتىق ۆولونتەرلىك جەلىسى قازىرگى پرەزيدەنت ۇمىتكەرلىگىن ۇسىناتىنىن ءمالىم ەتكەن.

كەشە پرەزيدەنت پاۆلودار وبلىسىنا جاساعان ساپارىندا الداعى سايلاۋعا قوعامدىق-ساياسي كۇشتەر كواليسياسىنىڭ اتىنان قاتىسقاندى ءجون كورىپ وتىرعانىن جەتكىزگەن.