سونىمەن، جۇڭگو كوممۋنيستىك پارتياسىنىڭ XX سەزى باستالدى، كۇمان جوق، بۇل كورشىمىزدىڭ ساياسي ومىرىندەگى ەلەۋلى وقيعا... ءداستۇر بويىنشا، قكپ وك-نىڭ باس حاتشىسى سي سزينپين وك اتىنان وتكەن بەس جىلداعى جۇمىستان ەسەپ بەردى...
قول جەتكەن ناتيجەلەردى قورىتىندىلاپ، الداعى بەس جىلدىڭ مەجەسىن ايقىندادى. جالپى، ۇلت جانە ءدىن ساياساتى وزگەرىسسىز قالادى – ءبىرتۇتاس جۇڭگو ۇلتىن قالىپتاستىرۋ جانە دىندەردى قىتايلاندىرۋ مەن سوسياليستىك قوعامعا بەيىمدەۋ جالعاسادى، مەملەكەتتىڭ ازاماتتار ومىرىنە ارالاسۋى ۇدەي تۇسەدى – قوعام مۇشەلەرىنە كوممۋنيستىك ەتيكالىق تاربيە كۇشەيتىلەدى، حالىق تۇرمىسى جاقسارتىلادى – جۇمىسپەن قامتۋ باسىم باعىتقا اينالادى (ەلدە جۇمىسسىزدىقتىڭ وسكەنىن جاناما تۇردە مويىندادى).
تايۆان ماسەلەسىنە بايلانىستى قارۋ قولدانۋدان باس تارتپايتىنىن قايتالاي مالىمدەدى، بۇل ءسي-دىڭ بۇرىننان بەرى ايتىپ كەلە جاتقان ۇستانىمى، دەگەنمەن، وسىنشا بيىك مىنبەردەن، پارتيا سەزىندە ايتىلۋى، مەن ءۇشىن كۇتپەگەن جاڭالىق بولدى، الداعى بەس جىلدا تايۆان بۇعازىنداعى جاعداي ونان سايىن ۋشىعۋى مۇمكىن.
پارتيانىڭ ارمياعا بيلىگى كۇشەيەدى، وسى ماقساتتا ارميانى قۇدىرەتتەندىرۋ بويىنشا نۇسقاۋلار ايتىلىپ، سوعىسقا ساقاداي ساي بولۋ جونىندە تاپسىرما بەرىلدى.
ايتپاقشى، جەمقورلىقپەن كۇرەستە باسىم جەڭىسكە قول جەتكەنىن اتاپ وتكەن سي قىتايدىڭ تاريحي سيكىلىنە جول بەرمەۋدىڭ ەكىنشى ءتاسىلىن تاپقانىن اۋىزعا الدى. العاشقى ءتاسىلدى، ارينە، ماو سزەدۋن تاپقان دەپ سانالادى، وسى جەردە ءسي-دىڭ ءوزىن ەكىنشى ماو رەتىندە كورسەتكىسى كەلەتىنى انىق بايقالدى.
ءسي-دىڭ بيلىگى تاعى دا بەس جىلعا جالعاساتىنى بەلگىلى بولدى، پارتيا جارعىسىنا تاعى دا وزگەتۋ ەنگىزىلمەك. دەگەنمەن، سەزدىڭ ءدال قارساڭىندا بەيجىڭدە ءسي-دىڭ بيلىكتەن كەتۋىن تالاپ ەتىپ، كورنەكتى كوپىرلەردىڭ بىرىنە پلاكات ءىلىنۋى ساياسي كۇرەستەردىڭ ۋشىعا تۇسەتىنىن، حالىق نارازىلىعىنىڭ اياق استىنان بۇرق ەتە ءتۇسۋى مۇمكىن ەكەنىن كورسەتتى.
ەرلان مازان
Xinjiang ۇنيۆەرسيتەتىنىڭ تۇلەگى
facebook پاراقشاسىنان
