جۋرناليست ايبار ولجايەۆ "ورىس تىلىندە سويلەگەندەرگە قازاقشا جاۋاپ بەرۋ تومەنگى مادەنيەت كورىنىسى" دەگەن "ChocoFamily" كومپانيالار توبىنىڭ باسشىسى راميل مۋحورياپوۆتىڭ ۇستىنەن ارىز جازدى.  جۋرناليست كاسىپكەردىڭ جەلىگە تاراپ كەتكەن رەپليكاسىنا قۇزىرلى ورگان تەكسەرۋ جۇرگىزىپ، ساراپتاما تاعايىنداۋى كەرەك دەپ سانايدى.

"وسىنداي، تەك زاڭدىق، كونستيتۋسيالىق پرينسيپپەن راميل مۋحورياپوۆتىڭ رەپليكاسىن ق ر قىلمىستىق كودەكسىنىڭ 174 بابى، 1 تارماعى بويىنشا تەكسەرۋدى سۇراپ، الماتى قالاسىنىڭ پروكۋراتۋراسىنا ارىز جىبەردىم. ارىز جت-2022-02543155 نومىرىمەن رەسمي تىركەلدى. 11 قاراشاعا دەيىن پروكۋراتۋرا رەسمي جاۋابىن جىبەرەدى. ەگەر مۋحورياپوۆتىڭ قىلمىسى دالەلدەنىپ، سوت شەشىمى شىقسا، ول قانداي جازاعا تارتىلۋى مۇمكىن؟ مۇنداعى ەڭ مينيمالدى جازا – 2 مىڭ ايلىق ەسەپتىك كورسەتكىش. ءقازىر ءبىر اەك – 3063 تەڭگە. دەمەك، ChocoFamily باسشىسىنىڭ ەڭ جەڭىل جازاسى – 6 126 000 تەڭگە ايىپپۇل بولۋى مۇمكىن. ءبىراق تەك مۇمكىن دەپ تۇرمىن. سەبەبى ماسەلەنى قۇزىرلى ورگاندار مەن سوت قانا شەشەدى"، دەپ جازدى ايبار ولجايەۆ facebook پاراقشاسىندا.

الەۋمەتتىك جەلىدە "ChocoFamily" كومپانيالار توبىنىڭ باسشىسى راميل مۋحورياپوۆتىڭ رەسەيلىكتەرمەن كەزدەسۋدە ايتقان ءسوزى قىزۋ تالقىعا ءتۇسىپ، ءقازاقتىلدى اۋديتوريانىڭ نارازىلىعىنا تاپ بولىپ جاتىر. كاسىپكەر كەزدەسۋدە "ورىس تىلىندە سويلەگەندەرگە قازاقشا جاۋاپ بەرۋ تومەنگى مادەنيەت كورىنىسى" دەگەن. ونىڭ بۇل مالىمدەمەسى ءبىراز ازاماتتاردىڭ اشۋىنا ءتيىپ، نارازىلىعىن تۋدىرعان. كەي ازاماتتار كاسىپكەر يەلىك ەتەتىن "ChocoFamily" كومپانيالارىڭ ونىمدەرىنە بويكوت جاريالاۋعا، ونىمدەرىن تۇتىنباۋعا ۇندەگەن.

ءقازاقتىلدى اۋديتوريانىڭ نارازىلىعىنان كەيىن كاسىپكەر بۇگىن ايتقان سوزدەرىن تۇسىندىرۋگە تىرىستى.

"ەگەر ورىس ءتىلىن ءبىلىپ، ءبىراق ءوزىڭنىڭ باسىمدىعىڭدى كورسەتۋ ءۇشىن قازاق تىلىندە جاۋاپ بەرۋ دۇرىس ەمەس دەپ ويلايمىن. مۇنداي ادامداردىڭ بويىندا قازاقتىڭ قوناقجايلىلىعى جوق. مەن قازاق ءتىلىن قۇرمەتتەيمىن، قازاقستان – مەنىڭ وتانىم! مەنىڭ سوزدەرىمدى دۇرىس تۇسىنبەگەنىن قالامايمىن. مەن كەز كەلگەن قىسىمعا قارسىمىن"، دەپ جازدى كاسىپكەر.