ەنەرگەتيكا ءمينيسترى بولات اقشولاقوۆ كوگىلدىر وتىننىڭ ەاەو-داعى ورتاق نارىعى تۋرالى كەلىسىمدەر بويىنشا كەلىسسوزدەر قالاي ءجۇرىپ جاتقانىن حابارلادى.
ءمينيستردىڭ مالىمەتىنشە، ازىرگە ەشقانداي قۇجاتقا قول قويىلماعان.
– رەسەي تاراپى ۇسىنىستارىنىڭ ءبىرى – ءرۋبلدى بارلىق ەسەپ ايرىسۋ قۇرالى ەتۋ تۋرالى بولدى. ءبىز وپسيا كەلىسىم-شارتقا قاتىسۋشى تاراپتاردىڭ تاڭداۋىنا قاراي بولۋى كەرەك دەگەن ۇستانىمدى بىلدىردىك، – دەدى مينيستر ورتالىق كوممۋنيكاسيالار قىزمەتىندەگى بريفينگتە.
مينيستر ۆاليۋتا تاڭداۋ ەكى تاراپتىڭ كوممەرسيالىق تالابى بولۋى كەرەكتىگىنە نازار اۋداردى.
كرەملدىڭ ۋكرايناداعى باسقىنشىلىعىن ايىپتاعان باتىس ەلدەرى رەسەيگە سانكسيا سالا باستاعان سوڭ ماسكەۋ ەۋروپاعا گاز ءۇشىن تولەم ەندى تەك رۋبلدە قابىلداناتىنىن، وعان كونبەگەندەرگە گاز ساتىلمايتىنىن ايتىپ دوق كورسەتكەن. الايدا ەۋروپا ەلدەرى بۇل تالاپ كەلىسىم-شارتتا كوزدەلمەگەنىن، ونى ورىندامايتىنىن اشىق مالىمدەدى.
31 ناۋرىزدا رەسەي پرەزيدەنتىنىڭ جارلىعى شىقتى. الايدا ول جەردە ورىس گازى ءۇشىن رۋبلدە تولەمەۋ مۇمكىندىگى دە بار. جارلىققا ساي، ساتىپ الۋشى رەسەيلىك گازپرومبانكتەن ۆاليۋتالىق جانە رۋبلدىك شوت اشادى. ساتىپ الۋشى كوگىلدىر وتىن ءۇشىن شەتەل ۆاليۋتاسىمەن ۆاليۋتالىق شوتقا تولەم جاسايدى. "گازپرومبانك" شوتتاعى ۆاليۋتانى ماسكەۋ بيرجاسىندا ساتىپ، الىنعان ءرۋبلدى رۋبلدىك شوتقا اۋدارادى. تۇپتەپ كەلگەندە، ماسكەۋدىڭ گازدى تەك رۋبلمەن ساتىپ الۋ تۋرالى تالابى ورىندالماي وتىر.
پىكىر قالدىرۋ