21 قازاندا اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ءىسى بويىنشا كەزەكتى سوت وتىرىسى ءوتتى، دەپ جازادى اق جايىق باسىلىمى. 

بۇعان دەيىنگى سوت وتىرىسىندا كۇدىكتى رىسقالييەۆ "پارا بەرۋشى مەن پارا الۋشىنىڭ اراسىندا دەلدال بولدىم" دەگەن العاشقى ايعاعىن وزگەرتىپ، حامەنوۆانىڭ 4،5 ميلليون تەڭگەگە ەش قاتىسى جوق ەكەنىن مالىمدەگەن. ونىڭ ايتۋىنشا، ول مۇنداي كۋالىكتى انتيكور قىزمەتكەرلەرىنىڭ قىسىمىمەن بەرگەن. 

سوت وتىرىسىندا انتيكور قىزمەتكەرلەرىنەن جاۋاپ الىندى. ولار رىسقالييەۆتىڭ ءسوزىن جوققا شىعارىپ، وعان ەشقانداي قىسىم جاسالماعانىن ايتتى. 

ءارى قاراي پروكۋرور رىسقالييەۆتىڭ باستاپقى ايعاقتارىنىڭ وزگەرۋىنە بايلانىستى ناقتىلاۋ ءۇشىن 2021 جىلدىڭ جەلتوقسانىندا جاسىرىن تەرگەۋ ارەكەتتەرى كەزىندە تۇسىرىلگەن ۇستاۋ ۆيدەوسىن قايتا قاراۋدى سۇرادى. حامەنوۆانىڭ ادۆوكاتى جولبولوۆ سوتتا بەرگەن ايعاعىن وزگەرتۋ قورعالۋشىسىنىڭ قۇقىعى ەكەنىن ايتىپ، پروكۋرور وتىنىشىنە قارسىلىق ءبىلدىردى. ونى ارىپتەستەرى مەن رىسقالييەۆتىڭ ءوزى قولدادى. ولاردىڭ پىكىرىن تىڭداعان سۋديا پروكۋروردىڭ ءوتىنىشىن قاناعاتتاندىرۋدان باس تارتتى. وسىدان كەيىن زالداعىلار ءبىر اۋىزدان قول سوقتى. سوتقا قاتىسۋشىلاردىڭ بۇل ارەكەتى سۋدياعا ۇناماي، ەسكەرتۋ جاسادى: 

– سىزدەرگە ەسكەرتۋ جاسايمىن. ءبىز بۇل جەردە ءوز جۇمىسىمىزدى اتقارىپ جاتىرمىز، ال سىزدەر مۇندا شوۋ جاساپ وتىرسىزدار ما؟ ۇيالى تەلەفونعا تۇسىرەسىزدەر، قول شاپالاقتايسىزدار، كۇلەسىزدەر، اڭگىمەلەسەسىزدەر. جالپى، بۇل ءتارتىپتى بۇزۋ بولىپ تابىلادى. بۇل ادامنىڭ مىنەز-قۇلىق مادەنيەتىن بىلدىرەدى. سوتقا قاتىسۋدى بىلمەيسىزدەر عوي... باسقا وتىنىشتەر بولماسا، سوت جارىسسوزىنە كوشەمىز، – دەدى سۋديا.

پروكۋرور رىسقالييەۆتىڭ سوتقا بەرگەن الدىڭعى ايعاقتارىنا بايلانىستى جارىسسوزگە دايىندالۋ ءۇشىن ۋاقىت سۇرادى. سۋديا پروكۋرور ءوتىنىشىن قاناعاتتاندىرىپ، كەلەسى سوت وتىرىسىن 27 قازانعا قالدىردى. حامەنوۆانىڭ ادۆوكاتى كەلەسى سوت وتىرىسىنا دەيىن بۇلتارتپاۋ شاراسىن ءۇيقاماققا نەمەسە ەشقايدا كەتپەۋ تۋرالى قولحاتپەن اۋىستىرۋدى سۇرادى. الايدا سۋديا تاعىلعان ايىپتىڭ اۋىر ەكەنىن ەسكەرىپ ادۆوكات ءوتىنىشىن قاناعاتتىرمادى.