رەسەي اقش-قا "گروم" ستراتەگيالىق يادرولىق كۇشتەر جاتتىعۋى باستالعانىن رەسمي تۇردە حاباردار ەتتى دەپ جازادى svoboda.org باسىلىمى. پەنتاگون مەن اقش مەملەكەتتىك دەپارتامەنت وكىلدەرىنىڭ حابارلاۋىنشا، اسكەري جاتتىعۋ كەزىندە يادرولىق وقتۇمسىق تاسۋعا قاۋقارلى بالليستيكالىق زىمىراندار سىنالادى.
مۇنداي اسكەري جاتتىعۋلار جىلدا وتكىزىلگەنىمەن، ۋكراينا مەن رەسەي سوعىسى ءوتىپ جاتقاندىقتان وعان بيىل ەرەكشە نازار اۋدارىلىپ وتىر.
"رەسەي وقۋ-جاتتىعۋ تۋرالى حابارلاۋ ارقىلى قارۋ-جاراقتى باقىلاۋ جونىندەگى مىندەتتەمەلەرىن ورىنداپ وتىر"، دەدى پەنتاگون وكىلى پاتريك رايدەر.
"مۇنداي ەسكەرتۋ جاتتىعۋدى بۇرىس باعالاۋدان ساقتايدى" دەپ ەسەپتەيدى اقش مەملەكەتتىك دەپارتامەنت وكىلى نەد پرايس.
مۇنداي اسكەري جاتتىعۋلار بۇعان دەيىن رەسەي ۋكرايناعا باسىپ كىرەردەن بىرنەشە كۇن بۇرىن ۇيىمداستىرىلعان. الايدا سول كەزدە جاتتىعۋدىڭ وتەتىنى حابارلانبادى. اقش وكىلدەرى رەسەي جاعىنىڭ جاتتىعۋ تۋرالى ەسكەرتۋىن ءبىر اپتا بويى كۇتكەن.
قازان ايىنىڭ باسىندا ناتو باس حاتشىسى يەنس ستولتەنبەرگ رەسەيدە وتەتىن اسكەري جاتتىعۋلاردى ءجىتى باقىلايتىنىن حابارلاعان ەدى.
پىكىر قالدىرۋ