سەناتتىڭ جالپى وتىرىسىندا "راقىمشىلىق جاساۋ تۋرالى" زاڭ جوباسىن ماقۇلدادى. 

زاڭ جوباسى قاڭتار وقيعاسى كەزىندە شاعىن جانە ورتا قىلمىس جاسادى دەپ ايىپتالعان ازاماتتارعا راقىمشىلىق جاساۋدى، ولارعا قاتىستى قىلمىستىق ىستەردى توقتاتۋدى كوزدەيدى. سونداي-اق زاڭ اياسىندا اۋىر جانە اسا اۋىر قىلمىس جاسادى دەپ ايىپتالعان ازاماتتاردىڭ باس بوستاندىعىنان ايىرۋ مەرزىمى قىسقارتىلادى دەپ جوسپارلانىپ وتىر. 

"تەرگەۋ ورگاندارى قاڭتار وقيعاسى كەزىندە قىلمىستىق قۇقىق بۇزۋشىلىق جاساعان 1600-دەي ادامدى انىقتاپ، ولاردى جاۋاپقا تارتىپ جاتىر. ونىڭ ىشىندە 1 112 ادامعا سوت ۇكىمى شىعارىلدى. باسقالارىنىڭ ءىسى تەرگەۋ ساتىسىندا. راقىمشىلىق سوتتا دا، تەرگەۋدە دە قولدانىلادى. جاسالعان قىلمىستاردىڭ ناقتى ۋاقىت ارالىعى جانە راقىمشىلىققا ىلىككەن ازاماتتار توبى بەلگىلەندى. زاڭ جوباسى تەرىس قىلىق، اۋىرلىعى تومەن جانە ورتاشا قىلمىس جاساعانداردى جازادان تولىق بوساتۋدى كوزدەيدى. ال جازاسىن وتەپ شىققانداردان سوتتىلىق الىنادى" دەپۋتات ءلاززات سۇلەيمەن.

زاڭ اياسىندا 1500 ادامعا راقىمشىلىق جاسالاتىنى حابارلاندى. راقىمشىلىق تەرروريستەر، ەكسترەميستەر، رەسيديۆيستەر، ازاپتاۋ جاساعاندار، تارتىپسىزدىك ۇيىمداستىرۋشىلار، مەملەكەتكە وپاسىزدىق جاساعان ادامداردى قامتىمايدى.