اتىراۋ قالالىق № 2 سوتىندا  اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ءىسى بويىنشا تاراپتاردىڭ تاتۋلاسۋ پروسەدۋرالارى باستالدى. پروكۋرور لاۋرا اسانوۆا حامەنوۆانى دۇنيە-مۇلكىن تاركىلەي وتىرىپ، 7 جىلعا باس بوستاندىعىنان، مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرۋ جازاسىن سۇرادى، دەپ حابارلادى AtyrauPress.kz سايتى.

پروكۋرور حامەنوۆانىڭ كامەلەت جاسىنا تولماعان بالاسى بارىن ەسكەرىپ، جازانى 3 جىلدان كەيىن وتەۋدى مىندەتتەۋدى ۇسىندى. سونداي-اق حامەنوۆانى "قۇرمەت" وردەنىنەن ايىرۋدى، قاماۋدا بولعان ءبىر كۇنىن ءبىر جارىم كۇنمەن ەسەپتەي وتىرىپ، جازا وتەۋ ورنى رەتىندە قاۋىپسىزدىگى ورتاشا مەكەمەنى تاعايىنداۋدى سۇرادى. 

ايىپتالۋشىلاردىڭ ءبىرى، بۇرىنعى مادەنيەت باسقارماسىنىڭ باسشىسى اقىلبەك رىسقالييەۆتى دە 7 جىلعا سوتتاۋدى سۇرادى.

اتىراۋ وبلىسى اكىمىنىڭ ەكس-ورىنباسارى باقىتگۇل حامەنوۆاعا ابايعا ەسكەرتكىش قويۋ ءۇشىن مەملەكەتتىك تاپسىرىس كەلىسىم-شارتىن جاساسقاندا 4،5 ملن تەڭگە كولەمىندە پارا الدى دەپ ايىپتالىپ وتىر. الايدا 13 قازاندا اقىلبەك رىسقالييەۆ كۇتپەگەن مالىمدەمە جاساپ، باستاپقى "پارا بەرۋشى مەن پارا الۋشى اراسىندا دەلدال بولدىم" دەگەن جاۋابىن وزگەرتىپ، حامەنوۆا 4،5 ملن تەڭگەگە ەشقانداي قاتىسى جوق ەكەنىن ايتقان. ول باستاپقىدا بەرگەن كۋالىگى انتيكور قىزمەتكەرلەرىنىڭ ىقپالىمەن بولعانىن جەتكىزدى. 

ال انتيكور قىزمەتكەرلەرى  رىسقالييەۆتىڭ ءسوزىن جوققا شىعارىپ، وعان ەشقانداي قىسىم جاسالمالى دەيدى.