قازاقستان كارىستەرى بىرلەستىگى ءتوراعاسىنىڭ كەڭەسشىسى گەورگيي كان الماتى قالاسىنداعى ەتنو مادەني قاۋىمداستىقتاردىڭ مىندەتتەرى مەن جوسپارلارى تۋرالى ايتتى. ونىڭ ايتۋىنشا، الماتىدا 100-دەن اسا ۇلت وكىلى بار. بۇل تۋرالى قوعامدىق كەلىسىم ۇيىمى جۇمىسىنىڭ 9 ايداعى قورىتىندىسى مەن پرەزيدەنت جولداۋىنا وراي ەتنومادەني ورتالىقتارعا قولداۋ كورسەتۋ شارالارى تۋرالى وتكەن الماتىداعى ورتالىق كوممۋنيكاسيالار قىزمەتىندەگى بريفينگ بارىسىندا ءمالىم ەتتى.

"الماتى قالاسى كوپۇلتتى 2 ملن ادامدى قامتيتىن ۇلكەن مەگوپوليس ەكەنىن وزدەرىڭىز دە جاقسى بىلەسىزدەر. قالادا 100-دەن اسا ۇلت وكىلى بار. قالامىزدا 2021 جىلى اشىلعان «دوستىق ءۇيى» بار. بۇل جەردە 35 ەتنو-مادەني قاۋىمداستىق بار. بۇل قاۋىمداستىقتار مەن مەكەمەلەر تەك ءبىر عانا ماقساتتا جۇمىس ىستەيدى. ءبىزدىڭ ماقساتىمىز – ۇلتتاردىڭ بىرلىگىن قامتاماسىز ەتۋ"، دەيدى قازاقستان كارىستەر بىرلەستىگى ءتوراعاسى. 

گەورگيي كان 2022 جىلدىڭ بۇكىل قازاقستان حالقى ءۇشىن اۋىر بولعانىن، الايدا بىرلىكتە بۇل قيىندىقتى دا ەڭسەرگەنىن ايتتى. 

"ءقازىر ءبىزدىڭ جۇمىس وتە اۋقىمدى. 2022 جىل ءبىز ءۇشىن وتە اۋىر، كۇردەلى جىل بولدى. 2022 جىلعى قاڭتار وقيعاسىنان كەيىن ۇلتارالىق كەلىسپەۋشىلىك ورىن الماس ءۇشىن بىرلەسىپ جۇمىس ىستەدىك. بۇل وتە اۋىر وقيعا ەدى. ءبىراق ءبىز ەل بولىپ، ءبىر بولىپ اتالعان قيىندىقتى دا ەڭسەردىك"، دەدى ول. 

سونداي-اق ول الداعى پرەزيدەنت سايلاۋىنا قاتىستى دا پىكىر ءبىلدىرىپ، ءوز جوسپارلارىمەن ءبولىستى. 

"ءار جىل سايىن بىزگە قويىلاتىن تالاپ پەن تاپسىرمالار وزگەرەتىنى بەلگىلى. سەبەبى الەمدىك جاعدايلار دا، مەملەكەتىمىزدە دە وزگەرىستەر ورىن الادى. بيىل مەرزىمىنەن بۇرىن پرەزيدەنت سايلاۋى وتكەلى جاتىر. وزدەرىڭىز بىلەتىندەي، سايلاۋعا قاتىساتىن كانديداتتار ءتىزىمى دە جاريالاندى. ءبىز دە وسى جۇمىسقا بىرىگىپ ءوز ۇلەسىمىزدى قوسۋدامىز. قازاقستاننىڭ پرەزيدەنتى قاسىم-جومارت توقايەۆتىڭ قاتىسۋىمەن الدا اشىق ءارى دەموكراتيالىق تۇردە سايلاۋ وتەتىن بولادى. قاسىم-جومارت كەمەل ۇلى ايتقان جاڭا ءارى ادىلەتتى قازاقستان قۇرۋ ءۇشىن حالىقتىڭ سەنىمى ماڭىزدى. حالىق مەملەكەتتىك قىزمەتكەرلەرگە، پوليسيا ورگانىنا جانە بيلىككە سەنىم ارتۋى كەرەك. ءبىز وسى ماقساتتا جۇمىس ىستەپ كەلەمىز" دەيدى گەورگيي كان.