قازاقستان كارىستەرى بىرلەستىگى ءتوراعاسىنىڭ كەڭەسشىسى گەورگيي كان اسسامبلەيا اياسىنداعى الەۋمەتتىك ماسەلەلەر بويىنشا ىسكە اسىرىلىپ جاتقان جۇمىستار مەن جوبالار تۋرالى ءسوز قوزعادى. بۇل تۋرالى قوعامدىق كەلىسىم ۇيىمى جۇمىسىنىڭ 9 ايداعى قورىتىندىسى مەن پرەزيدەنت جولداۋىنا وراي ەتنومادەني ورتالىقتارعا قولداۋ كورسەتۋ شارالارى تۋرالى وتكەن الماتىداعى ورتالىق كوممۋنيكاسيالار قىزمەتىندەگى بريفينگ بارىسىندا ءمالىم ەتتى.

"ءاربىر ۇلت وكىلى ءوز اينالاسىنداعى الەۋمەتتىك ماسەلەلەردەن حاباردار ەكەنى ءمالىم. ۇيعىرلار بولسىن، نەمىستەر بولسىن، قازاقتار بولسىن اينالاسىندا كىمنىڭ الەۋمەتتىك جاعدايى تومەن ەكەنىن جاقسى بىلەدى. مىسالى، ءبىر اۋىلدا ءبىر اقساقال جالعىز تۇرادى دەلىك. الەۋمەتتىك قىزمەتكەرلەردىڭ بۇل تۋرالى حابارسىز بولۋى مۇمكىن. مەملەكەتتىك قىزمەتكەرلەردىڭ دە جۇمىسى اۋىر، كوپ بولعاندىقتان بۇل كىسى تۋرالى بىلمەيتىن بولۋى مۇمكىن. سول سەبەپتى بارلىق ەتنو-مادەني بىرلەستىك ءوز قىزمەتى اياسىندا وسىعان ۇقساس ماسەلەلەردى شەشۋگە اتسالىسادى. اسىرەسە پاندەميا كەزەڭىندە مۇنداي جاعدايدى ءجيى باستان وتكەردىك. پاندەميا الەۋمەتتىك قىزمەتكەرلەر ءۇشىن ۇلكەن سىناق ەمتيحانى سەكىلدى بولدى. سەبەبى پسيحولوگيالىق جانە مورالدىق اۋىر ساتتە ارنايى دايىندىقتان وتكەن الەۋمەتتىك قىزمەتكەرلەردىڭ ءوزى ابىرجىپ قالدى. ادامدار كوشەگە شىعۋعا قورىقتى. وسى جاعدايدا اسسامبلەيا اياسىندا ارنايى موبيلدىك توپتار جاساقتالدى. ولار كومەككە مۇقتاج ادامدارعا ازىق-تۇلىك اپارىپ، دارى-دارمەكپەن قامتاماسىز ەتتى. ءدارى دە جەتىسپەي جاتقان، ازىق-تۇلىككە بارۋدىڭ ءوزى قورقىنىشتى بولدى. ءتىپتى كارىس تەاترىنداعى قىزمەتكەرلەرگە مەديسينالىق ماسكا جەتىسپەي جاتتى. بۇعان ۇقساس ونداعان مىسال كەلتىرۋگە بولادى. ءدارىحانادا قاراپايىم پارتەستامول ءدارىسىنىڭ باعاسى قىمباتتاپ كەتتى. سول سەبەپتى بىزگە شۇعىل كومەك كورسەتەتىن ارنايى موبيلدىك توپتار قاجەت بولدى. مەن ەتنومادەني بىرلەستىك وكىلدەرى بۇل جۇمىستى ابىرويمەن اتقارعانىن ۇلكەن سەنىممەن جانە ماقتانىشپەن ايتا الامىن"، دەيدى گەورگيي كان. 

قازاقستان كارىستەرى بىرلەستىگى ءتوراعاسىنىڭ كەڭەسشىسى گەورگيي كان قاڭتار وقعيعاسىندا ءاربىر ەتنوس وكىلدەرى ءۇشىن بىرلىك پەن قولداۋ ماڭىزدى بولعانىن ايتتى. 

"ءبىراق اراعا ۋاقىت سالىپ قاڭتار وقيعاسى ورىن الدى. الماتىدا توتەنشە جاعداي جاريالاندى. قايتادان ۇلكەن قيىندىقتى باستان وتكەردىك. پاندەميا كەزىندە اسسامبلەيا بىرلەستىكتەرى "انتيكوۆيد" اتتى اكسيا وتكىزگەن ەدى. سول سەكىلدى قاڭتار وقيعاسىندا بارىنشا ءوز تاراپىمىزدان كومەك كورسەتۋگە تىرىستىق. قارالى قاڭتار ەتنو-مادەني بىرلەستىك وكىلدەرى بىر-بىرىنە قولداۋ كورسەتىپ، حال-جاعداي سۇراستى. مۇنىڭ ءوزى ۇلكەن قولداۋ، كومەك دەپ بىلەمىن. ءاربىر ەتنوس وكىلى قيىن جاعدايعا تاپ بولعان كەزدە ەتنو-مادەني بىرلەستىك وكىلدەرىنە حابارلاسىپ، كومەك سۇرايدى. ارينە ءبىز شامامىز كەلگەنشە كومەك كورسەتۋگە تىرىسامىز. قاڭتار كەزىندە الماتىعا كەلىپ قيىن جاعدايعا تاپ بولعان ەتنوس وكىلدەرىنە كومەك كورسەتكەن كەزدەر بولعان. ال ءقازىر ءبىز وسىنداي قيىندىقتاردى ارتقا تاستاپ، جاڭا قازاقستاندى بىرگە قۇرۋعا ۇلەس قوسقالى وتىرمىز"، دەيدى ول.