بەلگىلى ءارتىس، ەسىمى الىس-جاقىن شەتەلگە تانىمال ورىنداۋشى ديماش قۇدايبەرگەن 150 مىڭنان استام تۇرعىنى بار ەكىباستۇز قالاسىنىڭ جىلۋسىز قالۋىنا كىنالى ادامداردى جاۋاپقا تارتىپ، تۇرمەگە جابۋعا شاقىردى. بۇل تۋرالى ول الەۋمەتتىك جەلىدەگى پاراقشاسىندا جازدى.

"ەكىباستۇزداعى حالىقتىڭ جاعدايى ءۇشىن الاڭداپ وتىرعانىمدى ايتپاسام دا تۇسىنىكتى بولار. مەنىڭ پاراقشامدى كوپتەگەن باسقا مەملەكەتتىڭ ادامدارى وقيتىن بولعاسىن، ىشكى ماسەلەمىزدى سىرتقا شىعارعىم كەلمەپ ەدى، ءبىراق مىنا دالادا قالعان انالارىمىزدىڭ كوز جاسى زايا كەتپەسىن دەسەڭىزدەر،جەو باسشىسىنان باستاپ، كىنالىلەردىڭ بارلىعى جاۋاپقا تارتىلىپ، جىلۋى جوق تۇرمەدە جازاسىن وتەيدى دەپ سەنەمىن…" دەلىنگەن ءارتىستىڭ جازباسىندا.

27 قاراشادا پاۆلودار وبلىسى ەكىباستۇز قالاسىنداعى جىلۋ ەلەكتر ورتالىعىندا اپات بولىپ، 30 گرادۋستىق ايازدا قالاداعى كوپقاباتتى ۇيلەر جىلۋسىز قالعان. 28 قاراشادا قالا بويىنشا توتەنشە جاعداي جاريالاندى. جىلۋ ەلەكتر ورتالىعى وليگارح الەكساندر كلەبانوۆقا تيەسىلى. قالانىڭ بۇرىنعى اكىمى نۇرجان اشىمبەتوۆ وليگارح شىعىنعا باتقان جىلۋ ورتالىعىن سۋبسيدياعا سەنىپ جەكەشەلەندىرىپ العانىن ايتادى. اپاتتان كەيىن پرەزيدەنت پروبلەمالىق ەنەرگورەسۋرستاردى مەملەكەت مەنشىگىنە قايتارۋ ماسەلەسىن قاراستىرۋدى تاپسىرعان. اپاتقا بايلانىستى قىلمىستىق ءىس قوزعالىپ، تەرگەۋ باستالعان. ەكىباستۇزدا جۇرگەن ۆيسە-پرەمەر رومان سكليار وليگارحتىڭ جاۋاپكەرشىلىگىنە بايلانىستى اڭگىمە ءتيىستى تەكسەرىس اياقتالعان سوڭ قوزعالاتىنىن ايتقان. بۇگىن قالاداعى 71 كوپقاباتتى پروبلەمالىق ءۇيدىڭ جەرتولەلەرىندەگى جىلىتۋ توراپتارىنا جىلۋ بەرىلگەنى حابارلاندى.