سەنات زەينەت جاسىن ۇزارتۋدى توقتاتاتىن زاڭدى قابىلدادى. زاڭعا سايكەس، كەلەسى جىلدان باستاپ ايەلدەردىڭ زەينەتكەرلىك جاسىن ارتتىرۋ ۋاقىتشا توقتاتىلادى. ياعني قازاقستانداعى ايەلدەردىڭ بارلىعى 2028 جىلعا دەيىن 61 جاستا زەينەتكە شىعادى.
سونىمەن قاتار، بالا كۇتىمىنە بايلانىستى جاردەماقىنى بالا 1،5 جاسقا دەيىن جەتكەنشە تولەۋ، ەڭ تومەن بازالىق زەينەتاقى مولشەرىن ەڭ تومەن كۇنكورىس دەڭگەيىنەن - 70 پايىزعا دەيىن، ەڭ جوعارى بازالىق زەينەتاقى مولشەرىن 120 پايىزعا دەيىن جەتكىزۋ ماسەلەلەرى قارالدى.
1 قىركۇيەكتە پرەزيدەنت جولداۋىندا ايەلدەردىڭ زەينەت جاسى 2028 جىلعا دەيىن 61 جاس دەڭگەيىندە بەلگىلەنەتىنىن مالىمدەگەن. بۇعان دەيىن ايەلدەردىڭ زەينەت جاسىن 63 جاسقا دەيىن كەزەڭ-كەزەڭمەن ارتتىرۋ جۇيەسى قولدانىلىپ كەلدى. الدىن الا ەسەپتەۋ بويىنشا ايەلدەر ءۇشىن زەينەتكەرلىك جاستى توقتاتۋعا ۇكىمەت 800 ملرد تەڭگە جۇمسايدى.
پىكىر قالدىرۋ