بلوگەر قۇرالاي رايسوۆا كيىم ساتاتىن ZARA ساۋدا جەلىسىندە قازاق تىلىندە قىزمەت كورسەتۋدى سۇراعانى ءۇشىن دۇكەن قىزمەتكەرلەرى ءوزىن قۋىپ شىقپاق بولعانىن حابارلادى.
"نامىسىم جەر، جىگەرىم قۇم بولدى. دوستىق پلازا ساۋدا ۇيىندەگى زارا دۇكەنىنىڭ بالالار بولىمىندە قازاقشا جاۋاپ سۇراعانىمىز ءۇشىن، ءوز جەرىمىزدە ءوز تىلىمىزدە سويلەگەنىمىز ءۇشىن جازىقتى بولدىق. كارىس بالانى قازاق ەكەن دەپ، "قازاقشا ايتا بەر" دەپ قالدىق، اڭگىمە سودان باستالدى. "منە ۋدوبنو نا رۋسسكوم" دەيدى الگى جىگىت. "ەندى بىزگە قازاقشا ىڭعايلى، ءسىز ءتۇسىنىپ تۇرسىز عوي، ايتا سالمايسىز با، قانشا بولدى؟" دەسەك، "منە تاك ۋدوبنو" دەيدى. وندا ءتىل بىلەتىن ادامدى شاقىر دەدىك. سول جەردىڭ ادمينيستراتورى مىنا قىز ەكەن، ول كەپ وزىمىزگە تاپ بەردى. "نەگە قازاقشا جاۋاپ بەر دەپ سۇرايسىزدار. ول باسقا ۇلت وكىلى، ءبىز مەجدۋنارودنايا كومپانيامىز. سوترۋدنيكتەرىمىز قاي تىلدە سويلەۋدى ءوزى بىلەدى"، دەپ ايتتى. سوندا ول جەرگە ەشقانداي حاقى جوق، داۋىسى جوق، قالاۋى جوق قازاقشا سويلەيتىن كليەنتتەر كەلەدى ەكەن"، دەدى قۇرالاي رايسوۆا Instagram جەلىسىندە.
ارتىنشا داۋعا دۇكەن اكىمشىلىگىنىڭ قىزمەتكەرى ارالاسىپ، "باسقا ۇلت، قازاقشا بىلمەيدى" دەپ قىزمەتكەرىن قورعاعان.
"وزىڭنەن ۇلكەنىرەك باستىق بار ما، اينالايىن، دەپ ەدىك، ەندى وحراننيكتەر كەلدى. ولارعا دا "ەمۋ ۋدوبنو نا رۋسسكوم" دەپ قاراپ تۇر. ءتىپتى دۇكەندە قازاقشا سويلەي الماساق، قايدا بارىپ سويلەيمىز؟ قاشان سويلەمىز؟ تەك وت باسى، وشاق قاسىندا ما؟ بۇيتە بەرسەك، قازاق ءتىلى "كەدەيلەر ءتىلى"، "دوماشنيي تاپىشكە" دەگەن مازاقتان قاشان قۇتىلادى؟! ەڭ جامانى، ءبىزدىڭ قۇقىمىزدى قورعايتىن، ءسوزىمىزدى سويلەيتىن ەشكىم جوعىن ءتۇسىنىپ، ءوزىمىزدى جەتىم سەزىنىپ شىقتىق..."، دەيدى بلوگەر.
قۇرالاي رايسوۆا سونداي-اق دۇكەن قىزمەتكەرلەرىنىڭ ءبىرى "ۆىپروۆوديتە يح" دەپ وزدەرىن دۇكەننەن قۋىپ شىقپاق بولعانىن، ونىڭ سول ارەكەتىنە نارازىلىق رەتىندە دورەكى فورمادا جاۋاپ بەرگەنىن ايتادى.
"ۆيدەو سوڭىندا "جاپ اۋزىڭدى" دەپ حورمەن ايقايلاعانىمىز – قىزعا ەمەس، سول كارىس جىگىتكە، "ۆىپروۆوديتە يح!" دەگەنىنە سولاي جاۋاپ بەردىك. ءوزى ءبىزدىڭ ءتىلدى مەنسىنبەۋىمەن قويماي، قۋىپ سالماقشى. شاڭىراققا قارايىن دەپ تۇرعان جوق، ءوز ۇيىمىزدەن ءوزىمىزدى قۋىپ سالعالى تۇر عوي. سوندىقتان، ول قاي تىلدە سويلەسە، سول تىلدە جاۋاپ بەرىلدى. مەنىڭ ءتىلىمدى قۇرمەتتەمەگەن ادامعا سىزىلىپ مادەنيەت ساقتار جايىم جوق ەكەن. وسى ۆيدەونى بولىسىڭىزدەرشى، بالكىم ءۇنىمىز جەتەر، بالكىم قازاق اۋديتورياسىنان كەشىرىم سۇرار..." دەپ جازدى بلوگەر.
بۇعان دەيىن Chocofamily باسشىسى راميل مۋحورياپوۆتىڭ رەسەيلىكتەرمەن كەزدەسۋ كەزىندە قازاقشا بىلمەيتىن وزگە ۇلت وكىلدەرىنە ورىسشا بىلە تۇرا قازاق تىلىندە جاۋاپ بەرۋ مادەنيەتسىزدىك ەكەنىن ايتقان سوزدەرى داۋ تۋدىرعان بولاتىن. كەيىن قازاقستاندىقتاردىڭ كوبى Chocofamily ونىمدەرىنە بايكوت جاريالاپ، ونىڭ ۇستىنەن باس پروكۋراتۋراعا دەپۋتاتتار، جەكەلەگەن ازاماتتار ارىزدانعان. راميل مۋحورياپوۆ بولسا، الەۋمەتتىك جەلى ارقىلى كوپشىلىكتەن كەشىرىم سۇراپ، ارتىق كەتكەنىن مويىنداعان ەدى.
پوسموترەت ەتۋ پۋبليكاسيۋ ۆ Instagram
پىكىر قالدىرۋ