ءبيشى، پەداگوگ، بالەتمەيستەر، قازاقستاننىڭ حالىق ءارتىسى، قازاقستان مەملەكەتتىك سىيلىعىنىڭ لاۋرەاتى بولات ايۋحانوۆ 86 جاسقا قاراعان شاعىندا ومىردەن ءوتتى.

بولات ايۋحانوۆ 1938 جىلى 13 قىركۇيەكتە سەمەي قالاسىندا دۇنيەگە كەلگەن. الماتى حورەوگرافيالىق ۋچيليششەسىن ا.سەلەزنيەۆتىڭ كلاسى بويىنشا، سانكت-پەتەربورداعى ا.ۆاگانوۆا اتىنداعى بي اكادەمياسىن، گيتيس-تىڭ بالەتمەيستەرلىك ءبولىمىن ءتامامداعان.

1957-1959 جىلدارى قازاق وپەرا جانە بالەت تەاترىنىڭ ءبيشىسى بولعان. 1967 جىلى «قازاقكونسەرت» جانىنداعى «الماتىنىڭ جاس بالەتى» ءانسامبلىن قۇرعان. سول جىلدان باستاپ وسى انسامبلدە بيلەر مەن حورەوگرافيالىق مينياتيۋرالاردى، كومپوزيسيالاردى («اققۋ»، «ايتىس»، «اڭشىلار ءبيى»، «جايدارمان»)، ءبىر، ەكى اكتىلى بالەتتەردى (م.راۆەلدىڭ «بولەروسى»، ۆ.بۋلگاروۆسكييدىڭ «قازاق سۋۆەنيرى»، ا.يساكوۆانىڭ «گاملەت»، «جارىس»، «باتىرلارى»، ت.قاجىعالييەۆتىڭ «كەرۋەنى»، ن.زاكيروۆتىڭ «ماڭگۇرتى»، بيزە-ششەدريننىڭ «كارمەن-سيۋيتاسى») ساحناعا قويعان.

1975 جىلدان باستاپ قازاقستان كلاسسيكالىق بي ءانسامبلىنىڭ كوركەمدىك جەتەكشىسى، بالەت ءسوليسى، 1976 جىلدان قازاقستان كلاسسيكالىق بي ءانسامبلىنىڭ كوركەمدىك جەتەكشىسى، ديرەكتورى بولعان. 1991 جىلدان باستاپ قازاق مەملەكەتتىك كلاسسيكالىق بي ءانسامبلىنىڭ كوركەمدىك جەتەكشىسى بولىپ، 2003 جىلدان بەرى ق ر مەملەكەتتىك اكادەميالىق بي تەاترىنىڭ ديرەكتورى قىزمەتىن اتقارعان.

سونداي-اق ە.برۋسيلوۆسكييدىڭ «قىز جىبەك» (ش.جيەنقۇلوۆامەن بىرگە)، د.شوستاكوۆيچتىڭ 4ء-شى سيمفونياسى بويىنشا «قىلمىس پەن جازا»، پ.چايكوۆسكيي مەن م.پلەتنيەۆتىڭ «ەۆگەنيي ونەگين»، ف.شوپەننىڭ «شوپەنيانا»، «پاحيتا» بالەتى نەگىزىندە قويىلعان گران پا (جەكە ءوزىنىڭ حورەوگرافيالىق بولجامدارى) ءتارىزدى جۇمىستارى قازاق بالەتىنىڭ عانا ەمەس، دۇنيەجۇزىلىك بالەت تاريحىنا ەنگەن جاڭالىقتار رەتىندە باعالانعان.

وتىز جىلدان استام ايۋحانوۆ جەتەكشىلىك ەتكەن انسامبل حورەوگرافيالىق ونەردى يگەرۋى جونىنەن الەمدىك بالەت ۇجىمدارىنىڭ ەڭ ۇزدىگى سانالاتىن العاشقى وندىعىنا ەنگەن. ونىڭ «مەنىڭ بالەتىم»، «سەزىمدەر ءومىربايانى» اتتى كىتاپتارى بار. ەۋروپا مادەنيەتىنىڭ حح عاسىرداعى 60 جارىق جۇلدىزى تۋرالى شىعاتىن 25 كىتاپتىڭ بىرەۋى ايۋحانوۆتىڭ ءومىرى مەن ونەرىنە ارنالعان (اۆتورى اۆستراليالىق ونەر زەرتتەۋشىسى يۋري ريۋنتيۋ). 

"بولەرو"، "قازاق سۋۆەنيرى"، "باتىرلار"، "قىز جىبەك"، "گاملەت"، "كارمەن-سيۋيتا"، "شىڭعىسحان" جانە باسقا قويىلىمدارعا قاتىسقان. "ءبىزدىڭ جەرىمىزدىڭ بايلىعى"، "جاۋىم، توعىزىنشى ۇلدان قورىق"، "تۇنەكتىڭ ءامىرشىسى"، "ايداي سۇلۋ ايسۇلۋ ەرتەگىسى تۋرالى" كينوفيلمدەرىنە تۇسكەن.

«قۇرمەت بەلگىسى»، «ەڭبەك قىزىل تۋ» وردەندەرىمەن ماراپاتتالعان.