ەلدە وقۋشى ورىنداردىڭ تاپشىلىعى ماسەلەسى جىل ساناپ ءوسىپ كەلەدى. ءبىر جىلدا ءۇش اۋىسىمدا وقيتىن مەكتەپتەردىڭ سانى تاعى 6 پايىزعا وسكەن. بۇل تۋرالى Ranking.kz پورتالى حابارلادى.

ءقازىر مەكتەپتەردىڭ كوپشىلىگى وقۋشىلاردى ەكى اۋىسىمدا وقىتادى، مۇنداي مەكتەپتەردىڭ سانى جىلدان جىلعا ارتىپ كەلەدى. ماسەلەن، 2021-2022 وقۋ جىلىندا ەلىمىزدە 5،2 مىڭ وسىنداي مەكتەپ جۇمىس ىستەسە، 2020-2021 وقۋ جىلىندا – 5،1 مىڭ، ودان بەس جىل بۇرىن، 2017-2018 وقۋ جىلىندا – 4،9 مىڭ ەكى اۋىسىمدىق مەكتەپ بولعان.

سونىمەن قاتار، ەلدە ءۇش اۋىسىمدا وقيتىن مەكتەپتەر سانى دا ارتىپ كەلەدى، بۇل ونسىز دا داعدارىستى جاعدايدىڭ ناشارلاعانىن كورسەتەدى. ماسەلەن، 2021-2022 وقۋ جىلىندا قازاقستاندا 169 ءۇش اۋىسىمدى مەكتەپ جۇمىس ىستەدى، بۇل ءبىر جىل بۇرىنعىدان 5،6% ارتىق (160 مەكتەپ)، ال ءۇش جىل ىشىندە مۇنداي مەكتەپتەردىڭ سانى بىردەن 32% وسكەن.

وڭىرلەر بويىنشا ءۇش اۋىسىمدى مەكتەپتەردىڭ ەڭ كوپ سانى الماتىدا (59 مەكتەپ)، سونداي-اق ماڭعىستاۋ (18 مەكتەپ)، اتىراۋ (17 مەكتەپ)، تۇركىستان (15 مەكتەپ) جانە پاۆلودار (10 مەكتەپ) وبلىستارىندا بايقالادى.

ءۇش اۋىسىمدى جانە اپاتتى مەكتەپتەردىڭ تاپشىلىعى ماسەلەسىن شەشۋ «جايلى مەكتەپ» ۇلتتىق پيلوتتىق جوباسى ىسكە قوسىلعان. ونى 2023 جىلدان 2025 جىلعا دەيىن ىسكە اسىرۋ جوسپارلانۋدا. ۇلتتىق جوبانىڭ ءبىرىڭعاي وپەراتورى رەتىندە «Samruk-Kazyna Construction» اق تاڭدالدى.

ۇلتتىق جوبانى جۇزەگە اسىرۋ اياسىندا رەسپۋبليكادا 842 مىڭ وقۋشى وقيتىن 401 جاڭا مەكتەپ سالىنادى دەپ جوسپارلانعان. 2023 جىلى 467،8 مىڭ وقۋشىعا ارنالعان 221 مەكتەپتىڭ قۇرىلىسىن باستاۋ جوسپارلانىپ وتىر. جالپى جوبانى جۇزەگە اسىرۋعا 2،6 ترلن تەڭگە مەملەكەت ينۆەستيسياسى باعىتتالادى.