سەناتتىڭ جالپى وتىرىسىندا "قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى" زاڭى قابىلداندى. قارجى ۆيسە-مينيسترى ەرجان ءبىرجانوۆتىڭ ايتۋىنشا، حالىقارالىق تاجىريبەنى ەسكەرە وتىرىپ، راسىمدەردىڭ 3 ءتۇرىن ەنگىزۋ ۇسىنىلىپ وتىر.
2022 جىلدىڭ 1 قازانىنىنداعى مالىمەتتەر بويىنشا 7،8 ميلليون ادامنىڭ ەكىنشى دەڭگەيلى بانكتەرگە، ميكروقارجى ۇيىمدارىنا جانە كوللەكتورلىق اگەنتتىكتەرگە بەرەشەگى بار.
زاڭدا سوتتان تىس بانكروتتىق، سوتتىق بانكروتتىق جانە تولەم قابىلەتتىلىگى راسىمدەرىن قالپىنا كەلتىرۋ ارقىلى تولەم قابىلەتتىلىگىن قالپىنا كەلتىرۋ مۇمكىندىگى قاراستىرىلعان. بارلىق ءۇش ءراسىمدى تەك بورىشكەر عانا باستايدى، ياعني كرەديتوردىڭ ولاردى بورىشكەرگە قولدانۋعا قۇقىعى جوق.
سوتتان تىس بانكروتتىق ءراسىمى تومەندەگىدەي جاعدايلاردا قولدانىلادى:
– بانكتەرگە، ميكروقارجى ۇيىمدارىنا جانە كوللەكتورلارعا بەرەشەك 4،9 ملن تەڭگەدەن (1600 اەك) اسپاۋى كەرەك؛
– رەسمي كىرىسى جوق نەمەسە تابىسى ەڭ تومەنگى كۇنكورىس دەڭگەيىنەن (36 018 تەڭگە) اسپاۋى كەرەك.
سوتتان تىس بانكروتتىق راسىمدەرى «ەلەكتروندىق ۇكىمەت» ۆەب-پورتالى ارقىلى ىسكە اسىرىلادى.
بۇدان بولەك بورىشكەردىڭ تۇراقتى تابىسى بولعان جاعدايدا قارىزدى تولەۋ ءۇشىن (5 جىلعا دەيىن) سوت تارتىبىمەن ءبولىپ تولەۋ جوسپارىن الۋ مۇمكىندىگى قاراستىرىلعان. اتالعان قارجى باقارۋشىمەن بىرلەسىپ ازىرلەنىپ، سوتپەن بەكىتىلەدى. بۇل پروسەدۋرانىڭ ارتىقشىلىعى، كەيىن ادام "بانكروت" دەگەن مارتەبەسىن المايدى.
بورىشكەر بانكروتتىق ءراسىمدى ىسكە اسىرعاننان كەيىن:
- 5 جىل بويى نەسيە الا المايدى؛
- 7 جىلدان كەيىن عانا بانكروتتىققا قايتا جۇگىنە الادى؛
- 3 جىل بويى ازاماتتىڭ قارجىلىق جاعدايىنا مونيتورينگ جۇرگىزىلەدى.
پىكىر قالدىرۋ