بۇگىن وقۋ-اعارتۋ ءمينيسترى قىزمەتىنەن بوساتىلعان اسحات ايماعامبەتوۆ وزىمەن 3 جارىم جىل ەڭبەك ەتكەن ادامدارعا العىس ءبىلدىرىپ، مينيستر بولىپ تۇرعاندا جۇزەگە اسىرعان ءبىرسىپىرا ىستەر تۋرالى ايتتى.

"وسى ۋاقىت ىشىندە ماعان جۇكتەلگەن سەنىمدى اقتاۋعا جانە اشىق بولۋعا، جۇمىستا ءتيىمدى ءارى پايدالى بولۋعا تىرىستىم" دەپ ءسوز باستاعان ول ءبىلىم جانە عىلىم سالاسىنا جاۋاپتى بولعان مينيستر رەتىندە ەسەپ بەرىپ، اتقارىلعان جۇمىستار تۋرالى ايتۋدى ءجون ساناعانىن جەتكىزدى.

"الداعى ۋاقىتتا مينيستر لاۋازىمىندا قابىلدانعان ءاربىر شەشىم تۋرالى ەگجەي-تەگجەيلى ەسەپ بەرۋدى جانە بۇل شەشىمدەردىڭ لوگيكاسى تۋرالى ايتۋدى جوسپارلاپ وتىرمىن. ونى كەز كەلگەن ادام كورە الادى. پرەزيدەنتتىڭ قولداۋى ارقاسىندا ءبىز وتە ماڭىزدى قۇجاتتى - «پەداگوگ مارتەبەسى تۋرالى» زاڭدى قابىلدادىق. سونىڭ ارقاسىندا تۇبەگەيلى وزگەرىستەر بولدى، مىسالى، جالاقىنى كوتەرۋ، قوسىمشا تولەمدەر، مىندەتكە جاتپايتىن قىزمەتتەردەن بوساتۋ، بەس كۇندىك جۇمىس اپتاسىنا اۋىسۋ، 30 جىل ەڭبەك ءوتىلى بار مۇعالىمدەردى ۇبت-دان بوساتۋ جانە 25 جىلدان استام جۇمىس ءوتىلى بار مۇعالىمدەرگە توسبەلگى تاعايىنداۋ جانە ت.ب.

ءبىز بالاباقشا تاربيەشىلەرىنە، كوللەدج مۇعالىمدەرى مەن ۋنيۆەرسيتەت وقىتۋشىلارىنا دا قولايلى جاعداي جاساۋعا تىرىستىق.

تاربيەشىلەرمەن، وقۋشىلارمەن، ستۋدەنتتەرمەن، ۇستازدارمەن، مەكتەپ، كوللەدج ديرەكتورلارىمەن، وقىتۋشىلارمەن، رەكتورلارمەن، عالىمدارمەن، ءبىلىم باسقارمالارى مەن ۆەدومستۆولىق باعىنىستى ۇيىمداردىڭ باسشىلارىمەن كوپتەگەن كەزدەسۋ وتكىزدىم. مەن ءۇشىن ءارتۇرلى دەڭگەيدەگى ءبىلىم بەرۋ وكىلدەرىنىڭ پىكىرلەرىن تىڭداۋ جانە قانداي دا ءبىر شەشىم قابىلداعاندا بارلىق ماسەلەنىڭ «وڭ» جانە «تەرىس» جاقتارىن تارازىلاۋ ماڭىزدى بولدى" دەگەن ول شەشىمدەرىن قولداعان مۇعالىمدەرگە، يدەيا مەن العا قويىلعان مىندەتتى ىسكە اسىرعان مينيسترلىكتەگى ارىپتەستەرىنە، قولداۋ ءبىلدىرىپ، سىن ايتقان قوعام قايراتكەرلەرى مەن بەلسەندىلەرگە،مينيسترلىك جاڭالىقتارىن جاريالاعان جۋرناليستەرگە العىس ايتتى.

ءسوزىنىڭ سوڭىندا ەكس-مينيستر قوعامعا اشىق ەكەنىن اتاپ ءوتتى.