قازگيدرومەت دەمالىس كۇندەرى ەل اۋماعىنىڭ باسىم بولىگىندە اۋا تەمپەراتۋراسى تومەندەيتىنىن حابارلادى.

اتلانتيكالىق سيكلون جانە ونىمەن بايلانىستى اتموسفەرالىق فرونتتار شىعىسقا قاراي باياۋ جىلجۋىنان اۋا-رايى تۇراقسىز بولىپ، ەلدىڭ باسىم اۋماعىندا قار جاۋادى. اسىرەسە شىعىستا قار مولىنان ءتۇسىپ، وڭتۇستىكتە جاڭبىر ارالاس قار جاۋادى.

"رەسپۋبليكا اۋماعىندا بۇرقاسىن، كوكتايعاق، باتىستا جانە وڭتۇستىكتە تۇمان بولادى دەپ بولجانۋدا. ءبىراق 7 قاڭتاردا سۋىق اركتيكالىق انتيسيكلون ەلىمىزدىڭ باتىسىنا جىلجي باستايدى، سونىمەن بايلانىستى جاۋىن-شاشىننىڭ بىرتىندەپ توقتاۋى جانە اۋا تەمپەراتۋراسى باتىستا، ودان كەيىن ەلىمىزدىڭ قالعان بولىگىندە كۇرت تومەندەۋى كۇتىلەدى. تەرمومەترلەردىڭ باعاندارى باتىستا، ورتالىقتا 20-28 ايازعا دەيىن، سولتۇستىك-باتىستا، سولتۇستىكتە 25-33 ايازعا دەيىن، شىعىستا 5-13 ايازعا دەيىن، ال ەلىمىزدىڭ وڭتۇستىگىندە 0-10 ايازعا دەيىن تومەندەۋى كۇتىلەدى" دەلىنگەن حابارلامادا.