جۇڭگو تاراپى قازاقستان-قىتاي شەكاراسىندا ەنگىزىلگەن شەكتەۋ جانە كارانتيندىك شارالاردى الىپ تاستايدى، دەپ حابارلادى قارجى مينيسترلىگى.

جۇڭگو كولىكتەردى ءوز اۋماعىنا كىرگىزە وتىرىپ، تاسىمالداۋدىڭ پاندەمياعا دەيىنگى فورماتىنا ورالۋعا نيەتتى. بۇل رەتتە اۆتوكولىك قۇرالدارىنىڭ جۇرگىزۋشىلەرىندەگى ۆيزا، پتر تەست، كولىك قۇرالدارى حالىقارالىق ستاندارتتارعا سايكەس كەلۋى ءتيىس.

الايدا شەكاراداعى شەكتەۋلەردى الىپ تاستاعاننان كەيىن، بۇرىن جۇڭگو تاراپى بەلگىلەگەن اۆتوكولىك قۇرالدارىنىڭ سيپاتتامالارىنا قويىلاتىن تالاپتارعا بايلانىستى سىرتقى ەكونوميكالىق قىزمەتتىڭ كەي قاتىسۋشىلارى نارازىلىق تانىتقان. ويتكەنى ولار اۆتوكولىك قۇرالدارىنا قويىلاتىن قاتاڭ تالاپتار كەزىندە اۆتوكولىك قۇرالدارىن قايتا جابدىقتاۋ بويىنشا بەلگىلى ءبىر شىعىنعا ۇشىراعان.

اتالعان ماسەلەگە بايلانىستى 9 قاڭتاردا "قالجات" وتكىزۋ پۋنكتىنە مەملەكەتتىك كىرىستەر كوميتەتىنىڭ باسشىلىق قۇرامى سىرتقى ەكونوميكالىق قىزمەتكە قاتىسۋشىلارمەن كەزدەسۋ وتكىزگەن.

مينيسترلىك كەزدەسۋ بارىسىندا شەكارا قىزمەتىمەن، جەرگىلىكتى اتقارۋشى ورگاندارمەن جانە تاسىمالداۋشىلارمەن بىرلەسىپ كەدەندىك راسىمدەردەن ءوتۋ، سونداي-اق مەملەكەتتىك شەكارادان ءوتۋ ءتارتىبى تۋرالى قاجەتتى تۇسىنتەمەلەر بەرىلگەنىن، سىرتقى ەكونوميكالىق قىزمەتكە قاتىسۋشىلار ءبىرقاتار سۇراقتار قويىپ، ولارعا ناقتى جاۋاپ العانىن جەتكىزدى.