20 قاڭتاردا زاڭگەر سەرجان پرالييەۆ اسكەرگە شاقىرىلۋشىنىنىڭ وزىنە قول جۇمساۋ فاكتىسىنە بايلانىستى قىلمىستىق ءىس بويىنشا باسپا ءسوز ءماسليحاتىن وتكىزىپ، تەرگەۋ بارىسىندا انىقتالعان كەي جايتتار تۋرالى حابارلاعان بولاتىن. ىشكى ىستەر مينيسترلىگى ادۆوكات ارەكەتىن قىزمەتتىك ەتيكا نورمالارىن بۇزۋ دەپ باعالاپ وتىر.
"ول ءوز تۇجىرىمدارى مەن شىندىققا سايكەس كەلمەيتىن جورامالدارىن قوسىپ، قىلمىستىق ءىستىڭ دەرەكتەرىن جاريا ەتتى. قىلمىستىق-پروسەسسۋالدىق كودەكستىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرى جاريالاۋعا جاتپايدى” دەلىنگەن اقپاراتتا.
ادۆوكاتتىڭ قىزمەتتىك ەتيكا نورمالارىن بۇزۋ فاكتىسى بويىنشا ماتەريالدار قىلمىستىق قۋدالاۋ ورگانىندا بەلگىلەنگەن تارتىپپەن تىركەلىپ، ادىلەت مينيسترلىگىنە قىزمەتتىك تەرگەۋ جۇرگىزۋ ءۇشىن جولدانعان.
كەشە زاڭگەر سەرجان پىرالييەۆ جامبىل وبلىسىندا اسكەري بورىشىن وتەۋ كەزىندە وزىنە قول سالعان 18 جاستاعى بەكبول ميراشتىڭ قازاسىن تەرگەۋ كەزىندە سارباز ولىمىنە بىرنەشە ادام زورلىق كورسەتكەنى سەبەپ بولعانى انىقتالعانىن، تەرگەۋ ورگاندارى كەي دەرەكتەردى ەلەمەي وتىرعانىن ايتقان.
بۇگىندە اتالعان فاكتى بويىنشا ءبولىم كومانديرى قاماۋعا الىنىپ، وعان قاتىستى "اۋىر زارداپقا اكەپ سوقتىرعان بيلىكتى اسىرا پايدالانۋ" بابى بويىنشا سوتقا دەيىنگى تەرگەۋ ءجۇرىپ جاتىر.
پىكىر قالدىرۋ