بۇگىن «AMANAT»-تىڭ اتقارۋشى حاتشىسى ەلنۇر بەيسەنبايەۆ پارتيانىڭ رەسپۋبليكالىق قوعامدىق قابىلداۋ بولمەسىنىڭ جۇمىسىمەن تانىستى. ول ءىس-شارا بارىسىندا ب ا ق وكىلدەرىنىڭ سۇراقتارىنا جاۋاپ بەردى.

اتقارۋشى حاتشى قازىرگى تاڭدا پارتيا ءوز سايلاۋالدى باعدارلاماسىن ازىرلەپ جاتقانىن جەتكىزدى.

«بۇل جۇمىسقا ءماجىلىستىڭ ەكس-دەپۋتاتتارى، پارتيا جانىنان قۇرىلعان كەڭەستەردىڭ مۇشەلەرى، بىلىكتى ساياساتتانۋشىلار، ەكونوميستەر تارتىلدى. ال سايلاۋالدى باعدارلاماعا ۇسىنىستار حالىقتان تىكەلەي جينالادى. پارتيانىڭ جارعىسىنا سايكەس، باعدارلامالىق قۇجاتتاردى قابىلداۋ سەزدىڭ قۇزىرىندا. جەر-جەردەگى پارتيالاستاردىڭ تالقىلاۋىنان جانە ساراپشىلاردىڭ تالداۋىنان وتكەن سايلاۋالدى باعدارلاما الداعى سەزدە قابىلدانادى»، - دەدى ە.بەيسەنبايەۆ.

ءوز كەزەگىندە، رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى ءاليا سادىربايەۆانىڭ ايتۋىنشا، سايلاۋ تۋرالى زاڭعا سايكەس، پارتيانىڭ قوعامدىق قابىلداۋلارى حالىققا كومەك بەرۋ، كەڭەس بەرۋ جۇمىسىن توقتاتتى. بۇل كەزەڭدە پارتيا ازاماتتاردان تەك ۇسىنىس-تىلەكتەر جيناپ، ساراپتاۋمەن اينالىسادى.

«ازاماتتاردىڭ تالاپ-تىلەكتەرى قوعامدىق قابىلداۋلاردان بولەك Call-ورتالىقتار، پارتيانىڭ سايتى مەن ەلەكتروندى پوشتاسى، ەgov.kz ەلەكتروندى ۇكىمەت پورتالى، سونداي-اق، WhatsApp مەسسەنجەرى ارقىلى قابىلدانادى. سوڭعى جەتى-سەگىز كۇندە ءبىزدىڭ قوعامدىق قابىلداۋلارعا 500-گە تارتا ۇسىنىس-تىلەك كەلىپ ءتۇستى. ولار پارتيانىڭ سايلاۋالدى باعدارلاماسىن ازىرلەۋ كەزىندە ەسكەرىلەدى»، - دەدى ءا.سادىربايەۆا.

سونىمەن قاتار، ەلنۇر بەيسەنبايەۆ ءماجىلىس سايلاۋىنا ۇسىنىلاتىن پارتيالىق ءتىزىم قانداي پرينسيپتەر بويىنشا جاساقتالاتىنىن اتاپ ءوتتى. ونىڭ ايتۋىنشا، ۇمىتكەرلەردى تاڭداۋداعى باستى پرينسيپ: اشىقتىق، ادىلدىك جانە جاڭارۋ.

«بۇكىل پروسەسس اشىق وتەدى. ءبىز بارلىق ۇسىنىسقا اشىقپىز، ىرىكتەۋ پروسەسى ءادىل وتەدى. ەڭ بەلسەندى، ءبىلىمدى، بىلىكتى ازاماتتار وسى تىزىمگە ەنۋى كەرەك. وعان قوسا، ءار ءتۇرلى جاس وكىلدەرى، جاستار، ايەلدەر، ءتۇرلى ماماندىق يەلەرى بولۋى ءتيىس. وكىلەتتىلىك دەگەنىمىز وسى. بۇعان قوسا، پارتيا تىزىمدەرىندە جاڭا ەسىمدەر كوپ بولادى»، - دەدى اتقارۋشى حاتشى.

بۇگىندە جەر-جەردە سايلاۋ شتابتارى قۇرىلىپ، پارتيا بەلسەندىلەرى مەن ەرىكتىلەرى الداعى ۇگىت جۇمىسىنا قىزۋ دايىندىقتى باستاپ كەتتى.

«ءبىز اشىق تا تارتىستى باسەكەگە دايىنبىز. باعىتىمىز – ادىلەتتى قازاقستان، ماقساتىمىز – مەملەكەتتىڭ تۇتاستىعى، تاۋەلسىزدىكتىڭ باياندى بولۋى»، - دەپ تۇيىندەدى ە.بەيسەنبايەۆ.

ايتا كەتەيىك، ەلىمىزدىڭ بارلىق وڭىرىندە «AMANAT»-تىڭ 243 قوعامدىق قابىلداۋ ورتالىعى جۇمىس ىستەيدى. بىلتىر بۇل ورتالىقتارعا 134 مىڭ ادام مۇڭ-مۇقتاجىن، ارىز-شاعىمىن ايتىپ كەلگەن. ولاردىڭ 90%-ىنىڭ ماسەلەسى وڭ شەشىلسە، قالعان 10%-نىڭ ارىز-شاعىمى قارالىپ جاتىر. بۇدان وزگە، بىلتىر 984 اۋىلدىق ەلدى مەكەندە 744 كوشپەلى قوعامدىق قابىلداۋ ۇيىمداستىرىلىپ، 7،4 مىڭ ءوتىنىم كەلىپ ءتۇستى. ولاردىڭ ۇشتەن ءبىرى دەرەۋ شەشىلسە، 60%-ى بويىنشا ماسەلەنى زاڭ اياسىندا شەشۋ جولدارى ءتۇسىندىرىلدى، ال قالعان 9%-ى قازىرگى تاڭدا ورىندالۋ ۇستىندە.

 «AMANAT» پارتياسىنىڭ باسپا ءسوز قىزمەتى