ماقسات ءابدىقادىر ۇلى شىعىس پەن قازاق مەديسيناسىن قاتار ۇشتاستىرعان. تامىر ۇستاپ، دياگنوز قويۋدى عىلىم دەڭگەيىندە مەڭگەرگەن. ءوزى بۇل ءتاسىلدى قازاق باعزى زاماننان بىلگەنىن، قازاق مەديسيناسىندا تا­مىر ۇستاۋدىڭ توعىز ءادىسى بارىن، اتا­لا­رىمىز تامىر ۇستاۋ ار­قىلى تۇرىنە، وڭىنە، كوزىنە، يىسىنە قاراپ دياگنوز قويا بىلگەنىن ايتادى. ورتالىقتا دياگنوز انىقتاۋدا تامىر ۇستاۋدان بولەك، ۋزي اپپاراتتارى مەن لابوراتوريالىق تەكسەرۋلەر قولدانىلادى. ول ءۇشىن سايكەس قۇرىلعى، قوندىرعىلار جەتكىلىكتى. دارى-دارمەك نەگىزىنەن شوپتەن جاسالادى.

دارىگەر ينەمەن ەمدەۋ ءادىسىنىڭ دە تەرەڭ مامانى. ەمدىك ينەلەردى ارنايى جۇڭگو، رەسەي، وڭتۇستىك كورەيادان الدىرادى. ينەمەن ەمدەۋ ءادىسىن قولداناردا زاماناۋي ستاندارتتار مەن حالىقارالىق ادىستەمەدەن اۋىتقىمايدى. ايتۋىنشا، دۇنيەجۇزىلىك دەنساۋلىق ساقتاۋ ۇيىمى ال­تىن ينەمەن اۋرۋدىڭ 46 ءتۇرىن ەمدەۋگە رۇحسات بەرگەن. كۇندەلىكتى ومىردە سولاردىڭ جيىرمادان استام ءتۇرى كەڭ تارالعان كورىنەدى. اتاپ ايتقاندا، جۇرەك جۇمىسىنان السىرەۋى، ۇيقىسىزدىق، سترەستىك جاعدايلار، اس قورىتۋ جۇيەسىنىڭ ناشارلاۋى، ءتۇرلى گرىجالار، بەدەۋلىك پەن بەل­سىزدىك، يممۋنيتەتتىڭ السىرەۋى، گارمونالدىق اۋىت­قۋشىلىق، اسقازان، ىشەك جولىنىڭ بۇزىلۋى سىندى كوپتەگەن كەسەلدەردى جەڭۋدە ينەمەن ەمدەۋ ءادىسىنىڭ پايداسى مول.

عالىم مەديسينا سالاسىنداعى تاجىريبەسى مەن ءبىلىمى نەگىزىندە ءشوپ دارىلەردى پايدالانۋ مەن ينە سالۋدىڭ پايداسى تۋرالى 2015 جىلى جارىققا شىققان "قازاق مەديسيناسى" كىتابىندا ەگجەي-تەگجەيلى تۇسىندىرگەن.

ماقسات ءابدىقادىر ۇلى ديسسەرتاسيالىق جۇمىسىنىڭ نىساناسى ەتىپ العان سەرەبرالدى سال اۋرۋىنا شالدىققان تالاي ءبۇلدىرشىننىڭ اياققا تۇرىپ كەتۋىنە جاردەمدەسكەن.

دارىگەر دسپ-مەن اۋىراتىن بالالاردىڭ 70-80 پايىزىنىڭ اتا-اناسى سيتومەگالوۆيرۋس ينفەكسياسىنا شالدىققانىن ايتادى. سوندىقتان جاس اتا-انالارعا ۇيلەنگەننەن كەيىن مىندەتتى تۇردە دارىگەرگە قارالىپ بارىپ پەرزەنتتى بولۋعا نيەتتەنۋگە كەڭەس بەرەدى.

ماقسات ءابدىقادىر ۇلى قازاقستاننان بولەك، قىتايدا دا كاسىبي تۇردە مويىندالعان. جۇڭگو حالىق رەسپۋبليكاسى ينەمەن ەمدەۋ قوعامىنىڭ مۇشەسى. جۇڭگو، اعىلشىن تىلدەرىنە جەتىك. جۇمىسىن سول جاقتا جالعاستىرسا، ۇلكەن قىزمەت تە، قىرۋار قارجى دا تابىلار ەدى. الايدا ول اتامەكەنىم دەپ، بالا-شاعام سول ەل­گە ءسىڭىپ كەتپەسىن دەپ كەلدى. سودان بەرى مىنە، 10 جىلدان استام ۋاقىت ساپالى قوعام قۇرۋ جولىندا قىزمەت ەتىپ كەلەدى.