بەلگىلى تەلەجۋرناليست يرينا سوۆەتجان ءماجىلىس دەپۋتاتتىعىنا كانديدات اتانباق. ول جالپى-ۇلتتىق سوسيال-دەموكراتيالىق پارتيا اتىنان پارتيالىق ءتىزىم بويىنشا ۇسىنىلىپ وتىر.

جسدپ جالپى جيىنتىعى 25 كانديداتتى تىزىمگە قوسىپ وتىر. ونىڭ 19-ى پارتيالىق ءتىزىم بويىنشا، 6-اۋى ماجوريتارلىق جۇيە بويىنشا ءبىرمانداتتىق وكرۋگتەن تۇسپەك. كانديداتتار ءتىزىمىن پرەزيدەنتتىككە كانديدات بولعان نۇرلان اۋەسبايەۆ باسقارادى.

25 كانديداتتىڭ دەنى رەسپۋبليكا جۇرتشىلىعى ءۇشىن بەيمالىم ادامدار. ولاردىڭ ىشىندە كاسىبي قىزمەتىمەن دە، ازاماتتىق پوزيسياسىمەن دە حالىقتىق ماسەلەلەردى ۇدايى كوتەرىپ جۇرگەندەردىڭ ءبىرى رەتىندە يرينا سوۆەتجاندى اتاۋعا بولادى.

يرينا ءالىمجانوۆا سوۆەتجان الماتى وبلىسىنىڭ تۋماسى. 31 ارنادان شىعاتىن "ينفورمبيۋرو" جاڭالىقتار قىزمەتىنىڭ ءتىلشىسى، "ءسوزدىڭ شىنى كەرەك" باعدارلاماسىنىڭ اۆتورى ءارى جۇرگىزۋشىسى. "ايتىلماعان اڭگىمە"، "جۇلدىزدى شاڭىراق"، "ايتا بەرسىن" باعدارلامالارىنىڭ رەداكتورى بولعان. الەۋمەتتىك ماسەلەلەردى وتكىر كوتەرىپ، اشىق ايتاتىن قايسار جۋرناليست رەتىندە كوپكە تانىمال.