جۋىردا ۇكىمەت وتىرىسىندا توتەنشە جاعدايلار ءمينيسترى ءبىرقاتار وبلىستاردا كۇننىڭ جىلىنۋىمەن سەل ءجۇرىپ، سۋ تاسقىنى بولۋى مۇمكىن ەكەنىن ءمالىم ەتتى. وقىس وقيعالار كوكتەم ەرتە كەلەتىن تۇركىستان وبلىسىندا باستالىپ تا كەتتى. وسى ورايدا قامشى پورتالى ءقاۋىپ ايماعىندا تۇرعان وبلىس اكىمدەرىنە سۇراۋ سالىپ، كوكتەمگى سۋ باسۋعا دايىندىعى، بۇعان دەيىنگى وقيعالاردان قانشالىقتى ساباق العانى جونىندە سۇرادى. تومەندە قوستاناي وبلىسىنداعى احۋال تۋرالى وبلىستىق توتەنشە جاعدايلار دەپارتامەنتى باستىعىنىڭ مىندەتىن ۋاقىتشا اتقارۋشى، پولكوۆنيك ازامات ورىمبايەۆ جاۋابى ۇسىنىلعان.

1) قوستاناي وبلىسىندا قانداي پروبلەمالىق ۋچاسكەلەر بار؟ قانشا ەلدىمەكەنگە سۋ باسۋ ءقاۋپى ءتونىپ تۇر؟

وبلىس اۋماعىندا تاسقىن جانە ەرىگەن سۋ باسۋى مۇمكىن ايماقتاردا 90 ەلدىمەكەن بار.

2) ەلدىمەكەندەردى سۋ تاسقىنىنان ساقتاۋ ءۇشىن، سۋ باسۋ زاردابىن تومەندەتۋ، وقىس وقيعالار مەن قايعىلى جاعدايلاردىڭ الدىن الۋ ءۇشىن نە ىستەلىنىپ جاتىر؟

الداعى سۋ تاسقىنىنا دايىندىق شەڭبەرىندە اعىمداعى جىلدىڭ 10 قاڭتارىندا «قوستاناي وبلىسىنداعى سۋ تاسقىنى كەزەڭىنىڭ توتەنشە جاعدايلارىن الدىن الۋ بويىنشا 2023 جىلعا ارنالعان ءىس-شارالار جوسپارى» بەكىتىلدى. 2023 جىلى قوستاناي وبلىسىنىڭ اۋماعىن ۇشۋعا، وزەندەردىڭ ءقاۋىپتى ۋچاسكەلەرىندە عارىشتىق مونيتورينگتى جۇزەگە اسىرۋعا جانە جارىلىس جۇمىستارىن جۇرگىزۋگە جەرگىلىكتى بيۋدجەتتەن 91،4 ملن. تەڭگە ءبولىندى. قالالار مەن اۋداندار اكىمدىكتەرىنىڭ ۇسىنعان دەرەكتەرى بويىنشا سۋ تاسقىنىن الدىن الۋ جانە ونىڭ سالدارىن جويۋ ءۇشىن 165،61 توننادان استام ججق، 10939،1 تونناعا جۋىق ينەرتتى ماتەريالدار، 46109 دانا قاپ دايىندالدى، زارداپ شەككەن حالىققا 24،71 توننا كولەمىندە ازىق-تۇلىك جەتكىزۋگە 103 نيەت-شارت جاسالدى. وسى باعىتتاعى دايىندىق ءىس-شارالارى جالعاستىرىلاتىن بولادى. توتەنشە رەزەرۆتە جانە شۇعىل شىعىندارعا ارنالعان رەزەرۆتە 2 ملرد. 206 ملن. 199 مىڭ تەڭگە سالىندى.

3) توتەنشە جاعدايلار ءمينيسترى يۋريي يلين سۋ باسۋدىڭ ءداستۇرلى سەبەپتەرى رەتىندە وزەن ارنالارىنىڭ تولىپ قالۋى مەن بالدىرلانۋىن، درەناجدىق-ارىق جۇيەلەرىنىڭ بولماۋىن اتاعان. مۇنداي پروبلەمالار ءسىزدىڭ وبلىستا قالاي شەشىلىپ جاتىر؟

وبلىستا اۋماقتى جانە حالىقتى قورعاۋ ماسەلەلەرىن شەشۋ ءۇشىن «2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسى» ىسكە اسىرىلۋدا، ونىڭ شەڭبەرىندە 2021-2022 جىلدار ىشىندە قوستاناي قالاسىنىڭ شەكاراسىندا جالپى اۋدانى 17 گەكتار توبىل وزەنىنىڭ ارناسىن تازارتۋ جۇرگىزىلدى. سونداي-اق، جول كارتاسىنىڭ قالعان جوبالارىن ىسكە اسىرۋ ءۇشىن 2023 جىلعا ارنالعان جەرگىلىكتى بيۋدجەتتەن 1ء-شى جسق ازىرلەۋگە 392 ملن.تەڭگە جانە 13 ملن. تەڭگە ءبولىندى.

جىل سايىن وبلىستا الداعى جىلدىڭ سۋ تاسقىنى كەزەڭىنە دايىندىق بويىنشا جازعى-كۇزگى كەزەڭگە ارنالعان ينجەنەرلىك جۇمىستار جوسپارى ازىرلەنەدى. 2023 جىلعى سۋ تاسقىنىنىڭ سالدارىن بارىنشا ازايتۋ ماقساتىندا، قاراسۋ اۋدانى قارامىرزا ا. سۋ تاسقىنى ءقاۋپى بار ەلدى مەكەندە سۋدى قوسىمشا بۇرۋ ءۇشىن 2022 جىلدىڭ جازىندا تۇنتۇگىر وزەنى بويىنداعى جەردى تازارتۋ جۇمىستارى جۇرگىزىلدى. جەر بەتىنىڭ 5400 شارشى مەتردەن استامى تازارتىلدى، سۋدىڭ وتۋىنە كەدەرگىلەردى جويۋ ءۇشىن وزەن ارناسىنا پاراللەل ەستۋاريي تازارتىلدى، سۋدىڭ وتۋىنە كەدەرگى كەلتىرەتىن جەر ءۇيىندىسى جويىلدى.

سونداي-اق، 2022 جىلى بەكىتىلگەن جوسپار شەڭبەرىندە اۆتوجولداردا 45 جاڭا سۋ وتكىزۋ قۇرىلىستارى ورناتىلىپ، 3 سۋ وتكىزۋ قۇرىلىستارىندا جوندەۋ جۇمىستارى جۇرگىزىلدى؛ 2055 سۋ وتكىزۋ قۇرىلىستارى، 26 266 مەتر نوسەر كارىزى، 855 سۋ بۇرۋ كانالدارى تازارتىلدى؛ جالپى ۇزىندىعى 756 مەتر 3 بوگەتتە نىعايتۋ جۇمىستارى جۇرگىزىلدى؛ ۇزىندىعى 2530 مەتر قوسىمشا جەر ۇيىندىلەرى سالىندى.

4) ۇكىمەت باسشىسى پروبلەمالىق وڭىرلەردىڭ اكىمدەرى قاردى ۋاقىتىلى شىعارۋدا سىلبىرت قيمىلداپ وتىرعانىن ءمالىم ەتىپ، شارۋانى شيراتۋدى تاپسىردى. وسى ۋاقىتقا دەيىن اتقارىلعان جۇمىس كولەمى قانداي؟

بۇگىنگى كۇنى جەرگىلىكتى اتقارۋشى ورگاندار ەلدى مەكەندەردەن 522،1 مىڭ تەكشە مەتر قار شىعاردى. وسى باعىتتاعى جۇمىس جالعاساتىن بولادى.

5) ءاليحان سمايلوۆ سونداي-اق وبلىس باسشىلارىنا بۇرىنعى قاتەلىكتەردى قايتالاماۋدى قاتاڭ تاپسىرعان. الدىڭعى جىلدارداعى جاعدايدان ناتيجە شىعارىپ، «بيىل وبلىسىمىز كوكتەمگى سۋ تاسقىنىنا ءتاس-تۇيىن دايىن» دەپ ايتا الاسىز با؟

6) كوكتەمدەگى وقىس وقيعالار كەزىندە جەرگىلىكتى اكىمدىكتەردىڭ شاماسى جەتپەي جاتقان جۇمىستى حالىق الەۋمەتتىك جەلى ارقىلى جىلۋ جيناپ شەشكەن جاعدايلارعا كوپشىلىك كۋا. سىزدەردىڭ وبلىس سۋ باسۋدىڭ زارداپتارىن جويۋ، سۋ باسقان ەلدىمەكەندەردىڭ حالقىن ەۆوكۋاسيالاۋ سىندى شارۋالارعا قانشالىقتى ءازىر؟

وبلىستاعى سۋ تاسقىنى جاعدايىنىڭ اسقىنۋى جاعدايىندا جالپى سانى 2959 ادام، 1078 بىرلىك تەحنيكا، 108 بىرلىك ءجۇزۋ قۇرالدارى، 267 بىرلىك موتوپومپاسى بار وبلىستىڭ ازاماتتىق قورعاۋ قىزمەتتەرىنىڭ كۇشتەرى مەن قۇرالدارىنىڭ توپتاماسى قۇرىلدى. بۇدان باسقا، قازاقستان رەسپۋبليكاسىنىڭ توتەنشە جاعدايلار مينيسترلىگى 8 وبلىسارالىق توپ قۇردى، ولار قاجەت بولعان جاعدايدا قوستاناي وبلىسىنا جەدەل كوشىرىلۋى مۇمكىن. سۋ تاسقىنى كەزەڭىندە زارداپ شەككەن حالىقتى جينايتىن 153 پۋنكت انىقتالدى، ولار 12،0 مىڭنان استام ادامدى قابىلداي الادى.

قازىرگى ۋاقىتتا ازاماتتىق قورعاۋ ورگاندارىنىڭ جانە جەرگىلىكتى اتقارۋشى ورگانداردىڭ كۇشتەرى مەن قۇرالدارى، تۇتاستاي العاندا، سۋ تاسقىنى كەزەڭىندە جۇمىسقا دايىن. سۋ تاسقىنى جاعدايىنا 2023 جىلدىڭ اقپان جانە ناۋرىز ايلارىنىڭ اۋا رايى جاعدايلارى ايتارلىقتاي اسەر ەتەتىنىن اتاپ وتكىم كەلەدى.