پاۆلودار قالالىق اكىمشىلىك قۇقىقبۇزۋشىلىق جونىندەگى مامانداندىرىلعان سوت وبلىستىق پوليسيا دەپارتامەنتىنىڭ بۇرىنعى باسشىسى نۇرلان ءماسىموۆتىڭ ەكى ءىسىن قارادى. سوت بيۋدجەتتىڭ ءىسىن ءتيىمسىز پايدالانعانى ءۇشىن ءار ءىس بويىنشا 214،4 مىڭ تەڭگە ايىپپۇل تاعايىندادى.
سوت دەپارتامەنتتىڭ 2021 جىلى 18 قىزمەتتىك جىلقىعا جەم ساتىپ الۋعا 60،9 ملن تەڭگە بولگەنىن انىقتاعان. الايدا نورمالاردى بۇزىپ، 10،7 ملن تەڭگە ارتىق جوسپارلاعان. 2022 جىلى جەمگە 13،4 ملن تەڭگە بولىنگەن، ءبىراق نورمادان تىس 8،5 ملن تەڭگە قوسىلعان.
سوت ءتيىمسىز جوسپارلاۋ بيۋدجەت اقشاسىن ءتيىمسىز پايدالانۋعا اكەپ سوقتى دەپ ەسەپتەيدى.
"وبلىستىق پوليسيا دەپارتامەنتى بۇرىنعى باسشىسىنىڭ كىناسى اكىمشىلىك قۇقىقبۇزۋشىلىق تۋرالى حاتتامالار ارقىلى، اۋديتورلىق ەسەپتەر، تەكسەرۋ كوميسسياسىنىڭ ماتەريالدارى، ايعاقتار جانە سوت زەرتتەگەن باسقا دا ماتەريالدار ارقىلى دالەلدەنەدى. سوت ق ر اقبتك 234-1-بابى بويىنشا ايىپتالۋشىعا ءار ءىس بويىنشا 214،4 مىڭ تەڭگە كولەمىندە ايىپپۇل تاعايىندادى"، - دەپ حابارلادى سوتتىڭ باسپا ءسوز قىزمەتى.
سونداي-اق، سوت اكىمشىلىك قۇقىقبۇزۋشىلىق تۋرالى حاتتاما جاساۋ كەزىندە ءىس جۇرگىزۋ نورمالارىن بۇزعانى ءۇشىن "پاۆلودار وبلىسى بويىنشا تەكسەرۋ كوميسسياسى" مم اتىنا جەكە قاۋلى شىعاردى.
نۇرلان ءماسىموۆتىڭ ءوزى ءقازىر وزگە قىلمىستىق ىستەر بويىنشا تەرگەۋدە وتىر. ول 2022 جىلى 17 قاڭتاردا قىزمەتىنەن بوساتىلىپ، ارتىنشا ىزدەۋ جاريالانعان. وعان اسا اۋىر سىبايلاس جەمقورلىق قىلمىس جاسادى دەگەن ايىپ تاعىلدى. 2022 جىلى 13 شىلدەدە ۇلتىق قاۋىپسىزدىك كوميتەتىنىڭ وكىلدەرى نۇرلان ءماسىموۆتى رەسەي شەكاراسىنىڭ ماڭىندا ۇستاعان.
پىكىر قالدىرۋ