تۇركيادا جەر سىلكىنىسى سالدارىنان قازا بولعان تاعى ءبىر قازاقستاندىقتىڭ دەنەسى تابىلدى، دەپ حابارلادى سىرتقى ىستەر مينيسترلىگىنىڭ باسپا ءسوز قىزمەتى.
"10 اقپاندا تۇركيانىڭ وڭتۇستىك-شىعىسىنداعى كاحرامانماراش قالاسىندا قۇتقارۋ-ىزدەستىرۋ جۇمىستارى بارىسىندا ايەلدىڭ دەنەسى تابىلدى. الماتىدان كەلگەن تۋىستارى ونى ق ر ازاماتى جانار جاقسىبەكوۆا دەپ تانىدى"، - دەلىنگەن حابارلامادا.
قازاقستاندىق ديپلوماتتار قازا تاپقان ايەلدىڭ دەنەسىن كاحرامانماراشتان انتالياعا جانە ودان ءارى الماتىعا جەتكىزۋگە، سونداي-اق، قاجەت قۇجاتتاردى راسىمدەۋگە كومەكتەسكەن. مارقۇمنىڭ دەنەسى تالدىقورعان قالاسىنا جەتكىزىلگەن.
"تاسىمالداۋ بويىنشا بارلىق شىعىندى مەملەكەت ءوز موينىنا الدى. سونىمەن قاتار، Pegasus تۇرىك اۆياكومپانياسىمەن قازا تاپقان ق ر ازاماتىنىڭ بىرگە كەلگەن تۋىستارىنا 90 پايىزدىق جەڭىلدىك بەرۋ تۋرالى ۋاعدالاستىققا قول جەتكىزىلدى" دەلىنگەن ۆەدومستۆو حابارلاماسىندا.
8 اقپاندا تۇركيانىڭ قازاقستانداعى ەلشىسى ءتورت قازاقستاندىق ءىز-تۇزسىز جوعالعانىن حابارلاعان. سول كۇنى ءۇيىندى استىنان قازاقستاندىق سابينا مامادياروۆا قۇتقارىلدى. وتكەن بەيسەنبىدە قازاقستاندىق قۇتقارۋشىلار انتاكيادا تولىعىمەن قيراعان التى قاباتتى عيماراتتىڭ ءۇيىندىسىن تازارتۋ كەزىندە قازاقستان ازاماتى ءادىل قادىربەكوۆتىڭ دەنەسىن تاپتى. كەيىنىرەك ەكىنشى قازاقستاندىق ميربولات قۇرماشيەۆتىڭ دەنەسى تابىلدى.
پىكىر قالدىرۋ