قازاقشا ءمازىر سۇراعان قوناقتارىن "فاشيست، ناسيست" دەپ بالاعاتتاعان الماتىداعى "دينارا" كافەسى قىزمەتكەرىنىڭ ارەكەتىنەن پوليسيا ەشقانداي قىلمىس قۇرامىن تاپپادى.
كافە ادمينيستراتورى بولعان جاعداي ءۇشىن كەشىرىم سۇراۋمەن شەكتەلىپ، مەكەمە جۇمىسىن جالعاستىرىپ جاتىر. قازاقشا ءمازىر ءالى جوق. ايتۋلارىنشا، ازىرلەنىپ جاتىر. سونىمەن وسى داۋعا دا وسىلايشا نۇكتە قويىلاتىن سياقتى.
قازاقستاندا ءقازاقتىلدى ازاماتتاردىڭ تۇتىنۋشىلىق قۇقىعى ءجيى بۇزىلادى. كوپتەگەن قىزمەت كورسەتۋ ورىندارى قازاقشا قىزمەت كورسەتپەيدى. مەنيۋ، افيشا ورىس تىلىندە جازىلادى، الەۋمەتتىك جەلىدەگى پاراقشالار ورىسشا جۇرگىزىلەدى. ءتۇرلى ۇيىم قۇجاتتارىنىڭ قازاقشاسى جوق. قازاقشاسى بولعاننىڭ وزىندە ۇعىنىقتى ەمەس. وزىنە تۇسىنىكتى تىلدە قىزمەت كورسەتۋدى سۇراعاندار ادەتتە دورەكى جاۋاپ الىپ، اۋىر سوزدەر ەستيدى. قوعامدىق ءتارتىپ بۇزدى دەپ ايىپتالىپ، ايىپپۇل ارقالايدى. قىلمىستىق جاۋاپكەرشىلىكە تارتىلعاندار دا بار.
سونداي جاعدايلاردىڭ ءبىرقاتارى تومەندە ۇسىنىلىپ وتىر.
2013 جىلى جۋرناليست جارىلقاپ قالىباي ۇشاقتا قازاقشا قىزمەت كورسەتۋدى تالاپ ەتىپ، SCAT اۋەكومپانياسى قىزمەتكەرىمەن داۋلاسقان. ارتىنشا، "بورتسەرىكتەرگە دورەكىلىك تانىتىپ، ولاردىڭ قىزمەتىنە كەدەرگى كەلتىردى، ۇشۋعا ءقاۋىپ ءتوندىردى، جولاۋشىلاردىڭ مازاسىن الدى" دەگەن شاعىم بويىنشا "ۇساق بۇزاقىلىق" بابىمەن اكىمشىلىك جازاعا تارتىلىپ، ءۇش كۇنگە قامالىپ شىقتى.
وسىعان ۇقساس جاعداي 2017 جىلى قايتالاندى. تۇركيا ازاماتى وعىز دوعان "Air Astana" بورتىندا قازاق تىلىندە قىزمەت كورسەتۋدى تالاپ ەتىپ، بورتسەرىكتەرمەن داۋلاسقان. تۇركيا ازاماتى قاۋىپسىزدىكتى ساقتاماعانى ءۇشىن 6 800 تەڭگە كولەمىندە ايىپپۇل ارقالاپ، ارتىنشا ۇلتتىق اۋە كومپانياسىن مەملەكەتتىك ءتىلدى قۇرمەتتەمەگەنى ءۇشىن سوتقا بەرىپ، جەڭىپ شىققان.
2020 جىلى الەۋمەتتىك جەلىدە ۇلتتىق سيپاتتاعى جازبالارىمەن تانىمال، قازاق ءتىلىن بىلمەيتىن قازاقستاندىقتاردى سىناۋمەن بەلگىلى بەلسەندى مارعۇلان بورانباي "ۇلتتىق الاۋىزدىقتى قوزدىردى"، "كونستيتۋسيالىق قۇرىلىستى كۇشپەن وزگەرتۋگە ارەكەتتەندى" دەپ ايىپتالىپ، 5 جىلعا سوتتادى.
2021 جىلى قازاقشا قىزمەتتى تالاپ ەتىپ جۇرگەن تىركەلمەگەن ءتىل مايدانى قوزعالىسىنىڭ جەتەكشىسى قۋات احمەتوۆتىڭ ۇستىنەن "الەۋمەتتiك، ۇلتتىق، رۋلىق، ءناسiلدiك، تەكتىك-توپتىق نەمەسە دiني الاۋىزدىقتى قوزدىرۋ" بابى بويىنشا قىلمىستىق ءىس قوزعالىپ، بەلسەندى ەلدەن كەتۋگە ءماجبۇر بولدى.
قازاق تىلىندە قىزمەت كورسەتۋدى تالاپ ەتىپ جۇرگەن تاعى ءبىر بەلسەندى، پاۆلودارلىق رۋزا بەيسەنبايتەگىن 2021 جىلى پوليسيا ەشنارسە تۇسىندىرمەستەن ۇستاپ الىپ كەتكەن. پوليسيا قىزمەتكەرلەرى بەلسەندىنى "ۇكىمەت قاعازىن جىرتىپ تاستاعانى" ءۇشىن ۇستادىق دەگەن. رۋزا بەيسەنبايتەگى بۇل ارەكەتكە ءماجبۇرلى تۇردە بارعانىن ايتقان. ويتكەنى بۇعان دەيىن تالاي مارتە ءوتىنىش، ەسكەرتۋ جاساپ ءجۇرىپ، ءوتىنىش بلانكتەردىڭ قازاق تىلىندەگى ۇلگىسىن ۇسىنۋعا قول جەتكىزە الماعان.
2022 جىلى پاۆلودار قالاسىندا رەسەيدەگى موبيليزاسيادان قاشىپ كەلگەندەرگە "قىرىم كىمنىڭ جەرى؟" دەگەن سۇراق قويعان قوعام بەلسەندىسى دياس قۇزايىروۆ 5 تاۋلىككە قامالىپ شىقتى.
پىكىر قالدىرۋ