تالدىقورعان قالالىق سوتى قاڭتار وقيعالارى كەزىندە ۇستالعانداردى ازاپتادى دەپ ايىپتالعان بەس پوليسەيگە ۇكىم شىعاردى، دەپ حابارلادى قالالىق سوتتىڭ باسپا ءسوز قىزمەتى.

ءىس ماتەريالدارىنا ساي، كۇدىكتىلەر 6 قاڭتاردا وبلىستىق پوليسيا دەپارلامەنتى عيماراتىنا شابۋىل جاساپ، قارۋ-جاراق پەن وق-دارىلەردى ۇرلادى دەگەن كۇدىككە ىلىنگەن 23 ازاماتقا فيزيكالىق، پسيحولوگيالىق كۇش كورسەتكەن.

پروكۋرور كۇدىكتىلەردىڭ ءبىرىن 5 جىلعا، ەكەۋىن 4 جىلعا، تاعى ەكەۋىن 2 جىلعا باس بوستاندىعىنان ايىرۋدى سۇراعان.

اقپاراتتىق حابارلاماسىندا جابىرلەنۋشىلەر سوتتالۋشىلاردى كەشىرىپ، سوتتان ولاردى باس بوستاندىعىنان ايىرماۋدى سۇراعانى ايتىلادى. 

سوت كۇدىكتىلەردىڭ كىناسىن تولىق مويىنداپ، كەلتىرىلگەن زالالدى وتەگەنىن، كامىلەت جاسىنا تولماعان بالالارى بارىن ەسكەرىپ كۇدىكتىلەردى 3 جىل مەرزىمگە قۇقىق قورعاۋ ورگاندارىندا قىزمەت اتقارۋ قۇقىعىنان ايىرا وتىرىپ، 3 جىلدان 4 جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىندادى.