باس پروكۋراتۋرانىڭ باسپا ءسوز قىزمەتى پولشادان قازاقستانعا قارجى پيراميداسى جەتەكشىلەرىنىڭ ءبىرى ەكستراديسيالانعانىن ءمالىم ەتتى.
"ول 2018-2020 جىلدار ارالىعىندا بوتەننىڭ مۇلكىن جىمقىرۋ ماقساتىندا قارجى پيراميداسىنىڭ جەتەكشىلەرىنىڭ ءبىرى بولا تۇرا، ازاماتتاردىڭ اقشالاي سالىمدارىن جالعان جوبالارعا تارتۋدىڭ قىلمىستىق سحەماسىن ۇيىمداستىرىپ، ۇلكەن قىزىعۋشىلىق تولەم جاساۋ ەلەسىن قالىپتاستىرعان دەگەن كۇدىككە ىلىنگەن. ۇيىمداسقان توپ مۇشەلەرىنىڭ قىلمىستىق ارەكەتتەرىنىڭ ناتيجەسىندە زارداپ شەككەن 1345 جابىرلەنۋشىگە 6،3 ميلليارد تەڭگەدەن استام شىعىن كەلتىرىلگەن" دەلىنگەن حابارلامادا.
پروكۋراتۋرا حابارلاماسىندا كۇدىكتى QI Trade Kazakhstan قارجى پيراميداسىنىڭ باسشىسى رەتىندە ايتىلادى.
كۇدىكتى قىلمىستىق قۋدالاۋ ورگاندارىنان جاسىرىنىپ، وعان حالىقارالىق ىزدەۋ جاريالانعان. باس پروكۋراتۋرا، ىشكى جانە سىرتقى ىستەر مينيسترلىگىنىڭ بىرلەسكەن جۇمىسىنىڭ ارقاسىندا كۇدىكتى ك. ەسىمدى ازامات قازاقستانعا ەكستراديسيالىپ، استاناداعى ۋاقىتشا ۇستاۋ يزولياتورىنا قامالعان. اتالعان ايىپ بويىنشا 5 جىلدان 12 جىلعا دەيىن باس بوستاندىعىنان ايىرۋ جازاسى قاراستىرىلعان.
پولشا ىزدەۋدە جۇرگەن ادامدى قازاقستانعا العاش رەت ەكستراديسيالاپ وتىر.
پىكىر قالدىرۋ