برازيليا جاعالاۋىندا بولعان جاڭبىر مەن سۋ تاسقىنى سالدارىنان 36 ادام قازا تاپتى. سان-سەباستياندا 35 ادام كوز جۇمسا، ۋباتۋبا مەرى جاس قىزدىڭ دەنەسى تابىلعانىن حابارلادى. جەكسەنبى كۇنى اۋدانداردا جاۋىن-شاشىننىڭ ايلىق مولشەرىنەن 2 ەسە كوپ دەڭگەيدە جاۋىن جاۋعان. بۇل تۋرالى ۆۆس سايتى حابارلادى.

قۇتقارۋ-ىزدەستىرۋ جۇمىستارى ءالى دە جۇرگىزىلۋدە. كەيبىر قالالاردا جىل سايىن وتەتىن كارناۆال تويلاۋعا تىيىم سالىنعان.

«قۇتقارۋشىلار سانى از. جاعداي قيىن. شىعىن كولەمىن ءالى ەسەپتەمەدىك. قالادا 50-گە جۋىق ءۇي قۇلاپ، ونداعان ادام ءىس-تۇسسىز جوعالىپ كەتتى» دەدى سان-سەباستيان قالاسىنىڭ مەرى فەليپە اۋگۋستو.

شەنەۋنىكتەردىڭ مالىمدەۋىنشە، سان-پاۋلۋدىڭ سولتۇستىك جاعالاۋداعى اۋدانداردان 338 ادام ەۆاكۋسيالانىپ، 228 ادام باسپاناسىز قالعان.

پرەزيدەنت لۋيس يناسيۋ لۋلا دا سيلۆا تۆيتتەردەگى پاراقشاسىندا جاقىندارىنان ايىرىلعاندارعا كوڭىل ايتا وتىرىپ، دۇيسەنبى كۇنى زارداپ شەككەن اۋداندارعا باراتىنىن جازدى.

«ءبىز ۇكىمەتتى ۇيىستىرىپ، جارالىلاردى ەمدەۋگە، ءىس-تۇسسىز جوعالعانداردى ىزدەستىرىپ، جول مەن  تەلەكومۋنيكاسيانى قالپىنا كەلتىرۋگە بارىمىزدى سالامىز» دەدى سيلۆا مىرزا.

زەرتتەۋشىلەر سۋ تاسقىنى سەكىلدى تابيعي اپاتتار كليمات وزگەرۋىنىڭ سالدارىنان جيىلەپ كەتكەنىن ايتادى. ايماقتا قايتادان قاتتى جاڭبىر جاۋىپ، قۇتقارۋشىلاردىڭ جۇمىسى قيىنداي ءتۇسۋى مۇمكىن.