يتاليانىڭ وڭتۇستىگىندە ميگرانتتار مىنگەن قايىق سۋعا كەتىپ، 59 ادام قازا تاپتى. قازا تاپقانداردىڭ قاتارىندا جاسقا تولماعان ءسابي بار. قايىق اپاتى كالابريانىڭ شىعىس جاعالاۋىنداعى تەڭىز كۋرورتى ستەككاتو-دي-كۋتر ماڭىندا بولعان، دەپ جازادى BBC.
ءقازىر اتالعان ايماقتا بىرنەشە توپ جاساقتالىپ، ىزدەۋ وپەراسياسى جۇگىزىلىپ جاتىر. قۇتقارۋ جۇمىستارىنىڭ ارقاسىندا 80 ادام قۇتقارىلعان. 59 ادامنىڭ ءمايىتى تابىلعان.
رەسمي دەرەك بويىنشا يران، اۋعانستان، سومالي مەن پاكىستاننان شىققان جۇزگە تارتا بوسقىن ءبىر قايىققا ءمىنىپ، يتاليا جاعالاۋىنا توقتاماق بولعان. جاعالاۋعا جاقىنداعان كەزدە تەڭىزدە داۋىل تۇرىپ، قايىق سۋعا باتىپ كەتكەن.
يتاليانىڭ پرەمەر-مينيسترى دجوردجيا مەلوني وقيعانى ەستىگەندە قاتتى قايعىرعانىن جانە مۇنداي اپاتتارعا ادام ساۋداسىمەن اينالىساتىن تاراپتار كىنالى ەكەنىن مالىمدەگەن.
پىكىر قالدىرۋ