قاڭتار ايىندا ەلدە كامەلەتكە تولماعاندارعا قاتىستى 227 قىلمىستىق قۇقىق بۇزۋشىلىق تىركەلگەن. بۇل وتكەن جىلدىڭ قاڭتار ايىمەن سالىستىرعاندا 32 پايىزعا كوپ، دەپ حابارلادى Ranking.kz پورتالى.

2022 جىلدىڭ وسى كەزەڭىندە سالاداعى قۇقىق بۇزۋشىلىقتار سانى جىلىنا 32،8% ازايىپ، 172 بولعان.

وڭىرلەر بويىنشا مۇنداي قۇقىق بۇزۋشىلىقتاردىڭ باسىم بولىگى الماتى وبلىسىندا جاسالعان. ءبىر جىل بۇرىن 18 ءىس بولسا، ءقازىر 25 ءىس تىركەلگەن

ودان كەيىنگى ورىنداردا الماتى قالاسى (23 ءىس، 2022 جىلى 8) جانە تۇركىستان وبلىسى (19 ءىس، ءبىر جىل بۇرىن 20) تۇر. اتىراۋ مەن جامبىل وبلىستارىندا ءارقايسىندا 17 ىستەن.

كامەلەتكە تولماعاندارعا قاتىستى قىلمىستىق قۇقىق بۇزۋشىلىقتاردىڭ ەڭ ازى ۇلىتاۋ (3) جانە اباي وبلىستارىندا (4) تىركەلگەن.

باپتار بويىنشا ستاتيستيكا تومەندەگىدەي:

♦ «ون التى جاسقا تولماعان اداممەن جىنىستىق قاتىناس نەمەسە سەكسۋالدىق سيپاتتاعى باسقا دا ارەكەتتەر» بابى بويىنشا ءبىر جىل بۇرىن 25 ءىس بولسا، ءقازىر – 45 ءىس؛

♦ «ءوزىن-وزى ولتىرۋگە دەيىن جەتكىزۋ» – 24 ءىس، ءبىر جىل بۇرىن 22 ءىس؛

♦ «زورلاۋ» جانە «سەكسۋالدىق سيپاتتاعى زورلىق-زومبىلىق ارەكەتتەرى» باپتارى بويىنشا ءارقايسىسى – 20 ءىس.

قازاقستان بۇۇ جانىنداعى بالا قۇقىقتارى تۋرالى كونۆەنسيانىڭ كوممۋنيكاسيا تارتىبىنە قاتىستى 3-فاكۋلتاتيۆتىك حاتتاماسىنا قول قويعان. بۇل قازاقستاندىقتارعا بالالار قۇقىعىنىڭ بۇزىلعانى تۋرالى بۇۇ-نىڭ بالا قۇقىقتارى جونىندەگى كوميتەتىنە شاعىم تۇسىرۋگە مۇمكىندىك بەرەدى.