قاڭتار ايىنىڭ قورىتىندىسى بويىنشا ەلدە ازىق-تۇلىك ءبىر ايدا 1،4 پايىز، جىلدىق مەندە 25،7 پايىز قىمباتتاعان. بۇل تۋرالى energyprom.kz سايتى حابارلادى.
ءبىر ايدا ازىق-تۇلىك باعاسى استانا مەن شىمكەنتتە ايتارلىقتاي (2،2%) قىمباتتاعان. جىلدىق ديناميكا بويىنشا ماڭعىستاۋ وبلىسىندا ازىق-تۇلىك تاۋارلارى بىردەن 31، پايىزعا وسكەن. ودان كەيىن تۇركىستان وبلىسى (27،4% قىمباتتادى) جانە شىمكەنتتە (27،2%) قىمباتشىلىقتىڭ جوعارى شەگى تىركەلگەن. باعانىڭ ەڭ تومەنگى ءوسىمى الماتى وبلىسىندا (23،8%) تىركەلگەن.
"جەمىس پەن كوكونىس ءبىر ايدا 4،5%، ءبىر جىلدا 21،2% قىمباتتادى. سونىڭ ىشىندە جەمىس ءبىر ايدا 1،6%، ءبىر جىلدا 19،7%، ال كوكونىس ءبىر ايدا 10،2%، ءبىر جىلدا 21% قىمباتتادى. جەمىستەردىڭ ىشىندە كەپتىرىلگەن ورىك (62،3%، 4 مىڭ تەڭگەگە دەيىن)، بانان (45،2%، 895 تەڭگەگە دەيىن)، اپەلسين (30،5%، 1 مىڭ تەڭگەگە دەيىن)، الما (12،4%، 547 تەڭگە دەيىن) جانە ليمون (8،5%-عا، 1،2 مىڭ تەڭگەگە دەيىن) قىمباتتادى. كوكونىستەردىڭ ىشىندە پياز (62،4%، 143 تەڭگەگە دەيىن)، قيار (55،6%، 1،1 مىڭ تەڭگەگە دەيىن)، قىزاناق (20،3%، 821 تەڭگەگە دەيىن)، كارتوپ (9،8%، 157 تەڭگەگە دەيىن)، قىزىلشا (1،9%، 242 تەڭگەگە دەيىن) جانە ءسابىز (1،2%، 149 تەڭگەگە دەيىن) قىمباتتادى" دەلىنگەن حابارلامادا.
ءسۇت ونىمدەرىنىڭ باعاسى وتكەن ايمەن سالىستىرعاندا 1،2%-عا وسكەن. ەت ءبىر ايدا 0،5%، ءبىر جىلدا 16،9% قىمباتتاعان.
ال ۇن باعاسى ءبىر ايدا 0،7%، ءبىر جىلدا 42،8%، نان ءبىر ايدا 0،3%، ءبىر جىلدا 19،2%، ماكارون ونىمدەرى ءبىر ايدا 0،9%، ءبىر جىلدا 42،3%-عا وسكەن.
پىكىر قالدىرۋ