"Salem Social Media" كومپانياسى “5:32” ۆەب-سەريالىنىڭ اۆتورلارىنا قاتىستى سوت شەشىمىنە نارازى. كومپانيا اپپەلياسيالىق سوتقا شاعىمدانباق، دەپ حابارلايدى Qamshy.kz اقپارات اگەنتتىگى. 

كومپانيا تورەشىنىڭ اۋىسۋىنا جانە جاڭا قۇرامداعى سوت وتىرىسىنىڭ ەكى-اق رەت وتۋىنە بايلانىستى دەرەكتەردىڭ تولىق قارالماعانىن ايتادى. 

"بالكىم، جاڭا تورەشى از ۋاقىتتا كىتاپپەن دە، سەريالمەن دە تولىق تانىسىپ ۇلگەرمەگەن شىعار. سوت ءوزى باستاماشىلىق ەتكەن 3 ساراپتامانىڭ بىردە-بىرەۋىن ەسەپكە الماعان. بارلىق ساراپتامالار اۆتورلىق قۇقىقتى بۇزۋ فاكتىسىنىڭ جوقتىعىن راستادى جانە سوڭىندا مىناداي قورىتىندى جاسادى: "انىقتالعان دەرەكتەر ءجاي عانا سايكەستىك، سونداي-اق سالىستىرىلاتىن وبەكتىلەردەگى جاعدايلاردىڭ جەكە ۇقساستىقتارى شىن مانىندە  ا.دجالدينوۆتىڭ كىتابىندا سيپاتتالعان وقيعالار باسقا دەرەككوزدەردەگىدەي  بولىپ تابىلادى". دەمەك، تاريحي جاعدايلار شىنايى ومىردەن الىنعان وقيعالار اۆتورلىق قۇقىقپەن قورعالمايدى"، دەپ حابارلايدى Salem Social Media. 

Salem social media سوتتىڭ بۇعان دەيىن "بىلو دەلو" تەلەباعدارلاماسىن دا، كىتاپ شىققان ۋاقىتقا دەيىنگى جۋرناليستەردىڭ ماقالالارى مەن مانياكتار جايلى بىلەتىن  كۋاگەرلەردىڭ ايعاقتارىن دا  ەسكەرمەگەنىن ايتادى. 

"سەناريستەر بۇل كىتاپتىڭ وزگە كىتاپتار سەكىلدى ناقتى فاكتىلەردى جيناقتاۋ ءۇشىن اقپارات كوزدەرىنىڭ ءبىرى بولعانىن ءارقاشان راستادى. سوتقا ءدال وسىنداي دەرەككوزدەردىڭ ۇلكەن ءتىزىمى بەرىلدى. سوت شەشىمىنىڭ لوگيكاسى بويىنشا، كىتاپتى وقۋ اۆتورلىق قۇقىقتى بۇزۋ دەپ تانىلادى"، دەيدى كومپانيا. 

ەسكە سالايىق، بۇعان دەيىن قازاقستاندىق اۆتور اسقار جالدينوۆ اتىشۋلى “5:32” سەريالىنىڭ اۆتورلارى مەن Salem Social Media كومپانياسىنا قارسى سوتتا جەڭىسكە جەتكەنىن جازعان ەدى.